गडचिरोली, पुढारी वृत्तसेवा : गडचिरोली आणि अहेरी विधानसभा स्वबळावर लढणाऱ्या शेतकरी कामगार पक्षाबरोबर आता खासदार चंद्रशेखर आझाद यांच्या आझाद समाज पक्ष आणि भाकप व माकप यांची स्थानिक आघाडी जाहीर करण्यात आली आहे.
आझाद समाज पक्षाचे जिल्हाध्यक्ष राज बन्सोड आणि शेतकरी कामगार पक्षाचे जिल्हा चिटणीस रामदास जराते यांच्या उपस्थितीत आयोजित एका बैठकीत या स्थानिक आघाडीची घोषणा करण्यात आली. यावेळी शेकाप नेते भाई शामसुंदर उराडे, अक्षय कोसनकर, आझाद समाज पक्षाचे जिल्हा प्रभारी धर्मानंद मेश्राम, कार्याध्यक्ष विनोद मडावी, महासचिव पुरुषोत्तम रामटेके, राहुल उराडे, आरमोरी विधानसभा अध्यक्ष ॠषी सहारे, भारतीय कम्युनिस्ट पक्षाचे जिल्हा सचिव देवराव चवळे, विनोद झोडगे, मार्क्सवादी कम्युनिस्ट पक्षाचे जिल्हा सचिव अमोल मारकवार यांच्यासह शेकडो कार्यकर्ते उपस्थित होते.
शेतकरी कामगार पक्षातर्फे गडचिरोली विधानसभेकरिता जयश्री जराते-वेळदा यांना उमेदवारी जाहीर करण्यात आली असून, लवकरच अहेरी विधानसभेचा उमेदवारही जाहीर करणार आहे. आझाद समाज पक्ष आरमोरी विधानसभेच्या रिंगणात आपला उमेदवार उतरवणार आहे. त्यामुळे इतर समविचारी पक्षांसह शेतकरी कामगार पक्ष आणि आझाद समाज पक्ष आता स्थानिक आघाडी करुन जिल्ह्यातील तीनही जागा लढणार आहेत.
या आघाडीच्या अहेरी, गडचिरोली, आरमोरी विधानसभेच्या उमेदवारांच्या प्रचारासाठी खासदार चंद्रशेखर आझाद आणि भाई जयंत पाटील यांच्या संयुक्त जाहीरसभाही होणार आहेत. एवढेच नव्हे, तर आगामी जिल्हा परिषद, पंचायत समिती आणि नगरपरिषदेच्या निवडणुकाही हे पक्ष एकत्र लढून प्रस्थापित काँग्रेस-भाजपला आव्हान देणार असल्याची माहिती रामदास जराते, शामसुंदर उराडे, धर्मानंद मेश्राम, राज बन्सोड व विनोद मडावी यांनी दिली.
