Chandrapur News: काठीच्या जोरावर गुराख्याची वाघाशी झुंज: प्रसंगावधानामुळे वाचला जीव
चंद्रपूर: ताडोबा-अंधारी व्याघ्र प्रकल्पातील पळसगाव वनपरीक्षेत्रात गुराख्यांनी दाखवलेल्या धाडसामुळे एक मोठा अनर्थ टळला. गुरुवारी (दि.७) दुपारी दीडच्या सुमारास जंगलात गुरे चारताना अचानक पट्टेदार वाघाने हल्ला चढवला. मात्र, प्रसंगावधान राखत गुराखी माधव गोसाई सोनवाणे यांनी हातातील काठीच्या साहाय्याने वाघाचा प्रतिकार केला आणि त्याला पिटाळून लावले. या घटनेत दोन गुराखी जखमी झाले आहेत.
जंगलातील जीवघेणा प्रसंग
पळसगाव येथील माधव सोनवाणे, सुभाष दडमल, हरिदास मोहुर्ले आणि मोकेश चौधरी हे चारही गुराखी जनावरांचा कळप घेऊन सरखाडोडा परिसरातील कक्ष क्रमांक २४१ मध्ये गेले होते. जनावरे चरत असताना दबा धरून बसलेल्या वाघाने अचानक डरकाळी फोडत हल्ला करण्याचा प्रयत्न केला. गोंधळात दोन गुराखी – मोकेश चौधरी आणि हरिदास मोहुर्ले – जनावरांच्या गर्दीत जखमी झाले.
धाडसी प्रतिकार आणि वाघाचा पराभव
वाघाने नंतर थेट माधव सोनवाणे यांच्यावर झेप घेतली. मात्र, त्यांनी प्रसंगावधान राखत हातातील काठीने तीन वेळा जोरदार प्रहार केले. त्यांच्या या धाडसी प्रतिकारामुळे वाघ मागे हटला. या संघर्षात सुभाष दडमल यांनीही मदतीचा हात दिला आणि अखेर वाघाला जंगलात पिटाळून लावण्यात यश आले.
तातडीने मदत आणि उपचार
घटनेची माहिती मिळताच वनविभागाचे कर्मचारी व स्थानिक नागरिक घटनास्थळी धावले. जखमी गुराख्यांना तातडीने खासगी वाहनाने चिमूर येथे उपचारासाठी हलविण्यात आले. गुराख्यांनी दाखवलेल्या धैर्याची परिसरात सर्वत्र चर्चा सुरू आहे. पळसगाव जंगलातील या घटनेने पुन्हा एकदा मानवी धाडस आणि प्रसंगावधानाचे महत्त्व अधोरेखित केले आहे. गुराख्यांनी दाखवलेल्या शौर्यामुळे मोठा अनर्थ टळला असून, त्यांच्या धैर्याची सर्वत्र प्रशंसा होत आहे.
