चंद्रपूर : ‘त्रिशूल’ वाघासोबत आलेल्या झुंजीत 'पारु' वाघिणीच्या बछड्याचा मृत्यू झाला. ही घटना ब्रह्मपुरी वनविभागाच्या चिमूर वनपरिक्षेत्रातील शेडेगाव पर्यटन क्षेत्रामध्ये रविवारी (दि.१५) उघडकीस आली. या बछड्याचे अंदाजे वय ९ महिने असल्याचे सांगण्यात येत आहे. सोमवारी घटनास्थळी शवविच्छेदन करून त्याच ठिकाणी त्याच्यावर अंत्यसंस्कार करण्यात आले.
वनरक्षक ए. एम. मेश्राम हे गस्तीवर असताना त्यांना रविवारी खडसंगी बफर लाईनजवळ एक नर बछडा मृत अवस्थेत आढळून आला. याबाबतची माहिती तात्काळ वनपरिक्षेत्र अधिकारी (प्रादेशिक) चिमूर यांना देण्यात आली. माहिती मिळताच त्यांचे अधिनस्त वनकर्मचारी घटनास्थळी दाखल झाले. शेडेगाव येथील घटनास्थळी वनपरिक्षेत्र अधिकारी (प्रादे.) चिमूर तसेच 'एनटीसीए' चे प्रतिनिधी अमोद गौरकर यांनी पाहणी केली. यावेळी मृत नर बछडा असल्याचे स्पष्ट झाले. त्याच्या चेहऱ्यावर, मानेवर व पुढच्या दोन्ही पायांवर खोल जखमा दिसून आल्या. 'पारू' नावाच्या वाघिणीचा हा बछडा असून ‘त्रिशूल’ या वाघाने त्याच्यावर हल्ला केल्याचा अंदाज व्यक्त करण्यात आला आहे. सोमवारी ब्रह्मपुरीचे उपवनसंरक्षक राकेश सेपट, सहायक उपवनसंरक्षक गायकवाड, वनपरिक्षेत्राधिकारी किशोर देऊळकर, विवेक करंबेकर व मनोज वाटे यांच्या उपस्थितीत पंचनामा करून बछड्यावर अत्यसंस्कार करण्यात आले.
