Varora Farmers Demand Night Farming Electricity
चंद्रपूर : शेतीकामासह पशुधनाची निगा राखण्यासाठी रात्रीच्या वेळी शेतांमध्ये वीजपुरवठा उपलब्ध असणे अत्यंत आवश्यक आहे. मात्र वरोरा तालुक्यातील अनेक भागांत रात्रीच्या वेळी वीजपुरवठा खंडित होत असल्याने शेतकरी आणि शेतमजुरांना अडचणींचा सामना करावा लागत आहे. त्यामुळे रात्री ठरावीक कालावधीसाठी शेतांमध्ये सिंगल फेज वीजपुरवठा सुरू ठेवावा, अशी मागणी शेतकऱ्यांनी वीज वितरण कंपनीकडे केली आहे.
वरोरा तालुक्यातील अनेक शेतांमध्ये पाळीव जनावरे बांधलेली असतात. सध्या पावसाळ्याचे दिवस असल्याने सर्पदंशासह इतर विषारी प्राण्यांचा धोका वाढला आहे. रात्रीच्या वेळी शेत परिसरात अंधार असल्याने शेतकरी तसेच पशुधनाच्या सुरक्षेचा प्रश्न निर्माण होत आहे. जनावरांना चारा-पाणी देणे, त्यांची देखभाल करणे तसेच अन्य शेतीविषयक कामांसाठीही रात्री वीज आवश्यक असल्याचे शेतकऱ्यांचे म्हणणे आहे.
काही दिवसांत सोयाबीनची काढणी सुरू होणार असून, या काळात शेतांमध्ये शेतमजुरांची ये-जा वाढणार आहे. रात्रीच्या वेळी वीज उपलब्ध नसल्यास शेतीकामांवर परिणाम होण्यासोबतच सुरक्षिततेचीही समस्या निर्माण होण्याची शक्यता आहे. त्यामुळे रात्रीच्या वेळेत किमान ठरावीक कालावधीसाठी सिंगल फेज वीजपुरवठा सुरू ठेवण्याची मागणी शेतकऱ्यांकडून करण्यात येत आहे.
या मागणीसंदर्भात शेतकऱ्यांनी वीज वितरण कंपनीच्या अधिकाऱ्यांना निवेदन देऊन तातडीने उपाययोजना करण्याची मागणी केली. संबंधित अधिकाऱ्यांनी या मागणीबाबत सकारात्मक भूमिका घेत, लवकरच रात्रीच्या वेळेत वीजपुरवठा सुरू करण्याचे आश्वासन दिल्याची माहिती आहे.दरम्यान, खासदार प्रतिभा धानोरकर आणि आमदार देवराव भोंगळे यांनीही या प्रश्नाकडे गांभीर्याने लक्ष देऊन शेतकऱ्यांना दिलासा द्यावा, अशी अपेक्षा शेतकऱ्यांनी व्यक्त केली आहे.
