बुलढाणा : शेगावचे आराध्य दैवत श्री संत गजानन महाराज यांच्या दर्शनासाठी येणाऱ्या भाविकांसाठी महत्त्वाची बातमी आहे. आगामी २५ फेब्रुवारी रोजी राष्ट्रपती द्रौपदी मुर्मू या शेगाव भेटीवर येत असल्याने, सुरक्षेच्या कारणास्तव मंदिर प्रशासनाने दर्शनबारीच्या वेळेत महत्त्वपूर्ण बदल केला आहे.
राष्ट्रपतींच्या दौऱ्याच्या पार्श्वभूमीवर, जिल्हाधिकारी आणि पोलीस प्रशासनाच्या सूचनांनुसार श्री गजानन महाराज संस्थानने खालील निर्णय घेतले आहेत:
दिनांक २४ फेब्रुवारी (मंगळवार): पोलिसांच्या 'मॉक ड्रिल' (सुरक्षा तालीम) साठी सकाळी १०:३० ते १२:०० या दीड तासाच्या कालावधीत दर्शनबारी तात्पुरती बंद राहील.
दिनांक २५ फेब्रुवारी (बुधवार): राष्ट्रपतींच्या प्रत्यक्ष दर्शन सोहळ्यामुळे सकाळी ०७:३० ते दुपारी १२:३० या पाच तासांच्या कालावधीत भाविकांसाठी दर्शन स्थगित ठेवण्यात येईल.
बुधवारी आयोजित 'आयुष राष्ट्रीय आरोग्य मेळाव्याच्या' उद्घाटनासाठी राष्ट्रपतींचे आगमन होत आहे. यावेळी त्या महाराजांच्या समाधीचे दर्शनही घेणार आहेत. राजशिष्टाचार आणि कडक सुरक्षा व्यवस्था राखण्यासाठी हे बदल करण्यात आले असून, बाहेरगावाहून येणाऱ्या भाविकांनी या वेळेची नोंद घेऊन आपले नियोजन करावे, असे आवाहन श्री गजानन महाराज संस्थानच्यावतीने करण्यात आले आहे.
