बुलढाणा: मालमत्ता जप्तीचा वॉरंट न बजावण्यासाठी संबंधिताकडून दहा हजारांची लाच घेतांना मेहकरच्या वरिष्ठ स्तर दिवाणी न्यायालयाचा 'बेलिफ' लाचलुचपत प्रतिबंधक विभागाच्या (एसीबी)जाळ्यात रंगेहाथ अडकला.आज गुरूवार दि.६ऑगस्टच्या सायंकाळी मेहकर येथील एसटी बसस्थानक परिसरात ही कारवाई करण्यात आली.या नंतर परिसरात खळबळ उडाली.
याबाबत एसीबीच्या सुत्रांनी दिलेली माहिती अशी की, एका दिवाणी दाव्यात संबंधित व्यक्तीची स्थावर मालमत्ता जप्त करण्यासाठी मेहकरच्या वरिष्ठ स्तर दिवाणी न्यायालयाने 'वॉरंट 'काढला होता. वॉरंट बजावण्यासाठी गेलेला दिवाणी न्यायालयाचा 'बेलिफ' जगदीश सुखदेव राऊत (३१,रा सिंदखेड राजा याने वॉरंटची अंमलबजावणी न करता परत जायचे असेल तर १५हजार रूपयांच्या लाचेची सुरूवातीला मागणी केली.
संबंधित व्यक्तीने याबाबतची तक्रार लाचलुचपत प्रतिबंधक विभाग(एसीबी) बुलढाणा कार्यालयात तक्रार नोंदवली. त्या तक्रारीची आज ६ऑगस्टच्या दुपारी मेहकर येथे पडताळणी करण्यात आली. दरम्यान दोघांमध्ये तडजोड होऊन १०हजारांची लाच देण्याचे ठरले. त्यानंतर सायंकाळच्या सुमारास एसीबीने मेहकर एसटी बसस्थानक परिसरात सापळा लावला. तक्रारदाराकडून १०हजार रूपयांची लाच घेतांना 'बेलिफ ' जगदीश राऊत याला रंगेहाथ ताब्यात घेण्यात आले. या प्रकरणी लाचलुचपत प्रतिबंधक कायद्यानुसार आरोपी जगदिश राऊतवर मेहकर पोलिसांत गुन्हा नोंदवण्यात आला. एसीबीचे पोलीस उपअधीक्षक भागोजी चोरमले, पोलीस निरीक्षक रमेश पवार, पोका. शैलेश सोनवणे, पंढरी शेळके, नितीन शेटे यांच्या पथकाने ही कारवाई केली.
