Bhandara Koka Wildlife Sanctuary Rush
भंडारा : भंडारा शहरापासून अवघ्या २० किलोमीटर अंतरावर असलेल्या कोका अभयारण्यात दिवाळीनंतर पर्यटकांची गर्दी वाढली आहे. नवेगाव-नागझिरा व्याघ्र प्रकल्पांतर्गत येणाऱ्या या अभयारण्यात वाघ, बिबट, हरीण यांसह विविध वन्यजीवांचे दर्शन पर्यटकांना घडत आहे. विशेष म्हणजे, अनेक पर्यटकांना पहिल्याच सफारीत वाघाचे दर्शन होत असल्याने त्यांचा उत्साह द्विगुणित झाला आहे.
कोका अभयारण्य हे भंडारा जिल्ह्यातील प्रमुख अभयारण्य म्हणून ओळखले जाते. घनदाट जंगल, शांत वातावरण आणि कोका सरोवराचे निसर्गरम्य सौंदर्य पर्यटकांना आकर्षित करीत आहे. दिवाळीच्या सुट्ट्यांनंतर सकाळ आणि संध्याकाळच्या सफारीसाठी दररोज शेकडो पर्यटक दाखल होत आहेत. नागपूर, भंडारा, गोंदिया, तुमसर, साकोलीसह छत्तीसगड आणि मध्य प्रदेशातूनही पर्यटक येथे येत आहेत.
जंगलातील पाणवठ्यांच्या परिसरात हरीण, सांबर, नीलगाय आणि रानडुकरांचे कळप दिसून येतात. वाघांसोबतच बिबट्यांचाही वावर पर्यटकांच्या आकर्षणाचा केंद्रबिंदू ठरत आहे. पहाटेच्या सफारीसाठी पर्यटक प्रवेशद्वारावर गर्दी करतात. थंडगार वातावरण, पक्ष्यांचा किलबिलाट आणि जंगलातील वन्यजीवांचे जवळून दर्शन पर्यटकांना वेगळाच अनुभव देत आहे.
पर्यटकांची वाढती संख्या लक्षात घेऊन वन विभागाकडून आवश्यक व्यवस्था करण्यात आली आहे. प्रवेशासाठी आॅनलाइन आणि आॅफलाइन बुकिंगची सुविधा उपलब्ध असून, पर्यटकांना जंगलातील नियमांचे पालन करण्याच्या सूचना दिल्या जात आहेत. जंगलात गोंगाट करू नये, प्लास्टिक फेकू नये आणि वन्यजीवांना त्रास देऊ नये, असे आवाहन वन विभागाने केले आहे. आगामी काळात थंडीचा जोर वाढल्यानंतर वन्यजीव दर्शनासाठी पर्यटकांची संख्या आणखी वाढण्याची शक्यता व्यक्त केली जात आहे.
कोका अभयारण्य पक्षीप्रेमी आणि छायाचित्रकारांसाठीही आकर्षणाचे केंद्र ठरत आहे. हिवाळ्याच्या पार्श्वभूमीवर स्थलांतरित पक्ष्यांचे आगमन सुरू झाले असून, कोका सरोवराच्या परिसरात विविध पक्ष्यांची रेलचेल पाहायला मिळत आहे. वन्यजीवांसह पक्ष्यांची छायाचित्रे टिपण्यासाठी छायाचित्रणप्रेमी सकाळपासूनच कॅमेरे घेऊन जंगलात दाखल होत आहेत.
पर्यटकांची वाढती संख्या स्थानिक अर्थव्यवस्थेलाही चालना देत आहे. जिप्सीचालक, स्थानिक मार्गदर्शक, हॉटेल व्यावसायिक आणि छोटे दुकानदार यांना पर्यटनातून रोजगाराच्या संधी उपलब्ध होत आहेत. पर्यटकांचा ओघ असाच कायम राहिल्यास कोका अभयारण्याची राज्यस्तरावरील ओळख अधिक मजबूत होण्यास मदत होईल, असे कोका अभयारण्याचे वनपरिक्षेत्र अधिकारी सूरज गोखले यांनी सांगितले.