अकोला; पुढारी वृत्तसेवा : महापालिकेत कार्यरत कर्मचा-यांना हेल्मेटची सक्ती करण्यात आली आहे. हेल्मेट न घालणा-या कर्मचा-याला एक हजाराचा दंड व तीन महिन्यांसाठी वाहन चालविण्याचा परवाना देखील रद्द करण्यात येणार आहे. उपप्रादेशिक परिवहन अधिकारी कार्यालयाने महापालिका प्रशासनाला कर्मचा-यांना हेल्मेट सक्ती करण्याचे पत्र दिले होते. त्या अनुषंगाने महापालिका प्रशासनाने कर्मचा-यांसाठी परिपत्रक जारी केले आहे. जिल्ह्यात मोटर सायकलचे होणारे अपघात आणि त्यात मृत्यू पावलेल्यांची संख्या पाहता हेल्मेटची सक्ती करण्यात आली आहे. सर्व शासकीय कार्यालये, निमशासकीय कार्यालयातील कर्मचा-यांना हेल्मेट सक्ती करण्यात आली आहे. हीच सक्ती महापालिकेत कार्यरत कायम आस्थापना, कंत्राटी व मानसेवी कर्मचा-यांना करण्यात आली आहे. या अनुषंगाने महापालिकेच्या आयुक्त नीला वंजारी यांनी कर्मचा-यांसाठी परिपत्रक प्रसिद्ध केले असून, कर्मचा-यांनी हेल्मेट न वापरल्यास हजार रुपये दंड आकारण्याचा इशारा दिला आहे. महापालिकेच्या संबंधित विभागाचे विभागप्रमुख याकडे लक्ष देणार आहेत.
अकाेला येथील उपप्रादेशिक परिवहन अधिकारी जयश्री दुतोंडे यांनी एक पत्र काढून जिल्ह्यातील सर्वच शासकीय, निमशासकीय कार्यालयांना आदेश काढून कर्मचा-यांना हेल्मेट सक्तीचे आवाहन करण्यात आले आहे. कर्मचा-यांना हेल्मेट सक्ती करण्याची जबाबदारी कार्यालय प्रमुखांकडे देण्यात आली आहे. ज्या आस्थापनेतील कर्मचा-यांनी हेल्मेट घातले नाही, त्या कर्मचा-याच्या आस्थापना प्रमुखांना त्याकरीता जबाबदार धरण्यात येणार आहे. तसेच नियम भंग करणा-या वाहनधारकाला एक हजारांचा दंड व त्याचा वाहन चालविण्याचा परवाना तीन महिन्यांसाठी रद्द करण्यात येणार असल्याचे पत्रात स्पष्टपणे नमुद केले आहे.
