अमरावती : घरगुती वाद टोकाला गेल्याने बापाने आपल्या पोटच्या मुलाचा धारदार शस्त्राने खून केला. ही घटना मंगळवारी (दि.३) दुपारी तीनच्या सुमारास अमरावतीमधील लुंबिनी नगरात घडली. राहुल पांडुरंग काकडे (वय ४०) असे खून झालेल्या मुलाचे नाव असून याप्रकरणी वडील रामकृष्ण काकडे (वय ६१) यांना फ्रेजरपुरा पोलिसांनी ताब्यात घेतले आहे.
पोलिसांकडून मिळालेली अधिक माहिती अशी, वडील सेक्युरिटी गार्डची नोकरी करतात. मात्र मुलगा काही काम न करता घरीच असायचा. मंगळवारी वडील पांडूरंग कामावरून घरी आले असता राहुल व त्यांच्यात घरगुती कारणावरून वाद झाला. हा वाद विकोपाला गेल्याने रागाच्या भरात बापाने धारदार शस्त्राने राहुलचा निर्घृण खून केला. या घटनेनंतर जखमी मुलगा राहुल याला रुग्णालयात उपचारासाठी दाखल करण्यात आले होते. मात्र डॉक्टरांनी तेथे त्याला मृत्यू घोषित केले.
घटनेची माहिती मिळताच फ्रेजरपुरा पोलिसांसह सहाय्यक पोलीस आयुक्त कैलास पुंडकर, पोलीस निरीक्षक निलेश करे यांनी घटनास्थळी येऊन मृतदेहाचा पंचनामा केला. व संशयित आरोपी वडील पांडुरंग काकडे याला अटक केली. मुलाच्या खूनप्रकरणी त्याच्याविरुद्ध गुन्हा दाखल करण्यात आला असून घटनेचा पुढील तपास फ्रेजरपुरा पोलीस करत आहे.