मोर्शीपासून ५ कि.मी.अंतरावर असलेल्या तरोडा धानोरा येथे १९ जुलैच्या रात्री येथील काही पुरूष व महिला जंगलु टेकाम (६२), मयाराम धुर्वे (६७), सिताराम शेषराव परतेती (३७), सुंदा मयाराम धुर्वे (६५), सिंधु इसम धुर्वे (४५), सुमेलाल श्यामू कुमरे (४०, सर्व रा. तरोडा), सुखदेव जिवता उईके (४२, रा.धानोरा) यांनी गावठी मोहाची दारू पिली. त्यानंतर त्यांची प्रकृती अचानक अस्वस्थ झाली. त्यांना चक्कर व उलटी होऊ लागल्याने त्यांना मोर्शीतील उप-जिल्हा रुग्णालयात दाखल करण्यात आले. सदर अस्वस्थ झालेल्या पुरूष व महीलांपैकी जंगलु टेकाम वय (६२, रा.तरोडा) व मयाराम धुर्वे (६७, रा. तरोडा) यांचा उपचारापूर्वीच मृत्यू झाल्याचे डॉक्टरांनी घोषित केले. इतर अस्वस्थ रूग्णांपैकी सिताराम शेषराव परतेती, सुंदा मयाराम धुर्वे, सिंधु इसम धुर्वे, सुमेलाल शामू कुमरे व सुखदेव जीविता उईके यांचेवर उपजिल्हा रुग्णालयात प्रथमोपचार केल्यानंतर त्यांना पुढील उपचाराकरिता अमरावती येथील जिल्हा सामान्य रूग्णालय दाखल करण्यात आले आहे. ही दारू चन्द्रकला जंगलु टेकाम हीने आणून दिली होती, तर त्यामुळे या दारूमुळे त्यांना बाधा झाली असावी असा कयास व्यक्त करण्यात येत आहे. पोलीस तपासात मृतक मयाराम धुर्वे याने ती दारू आणल्याची माहिती पुढे होती व सदर दारू पिल्याने प्रकृती बिघडत असल्याचे माहीत असुन सुध्दा चंद्रकला टेकाम हीने ती दारू नागरिकांना पिण्यास दिली. त्यामुळे पोलिसांनी दोन्ही आरोपीविरूध्द भादंविच्या कलम ३०४, ३२८, ३४ अन्वये गुन्हा नोंदविला आहे. चन्द्रकला टेकाम हीला मोर्शी पोलिसांनी ताब्यात घेऊन चौकशी सुरु केली होती, तर दुसरा आरोपी मयाराम धुर्वे याचा उपचारादरम्यान मृत्यू झाला होता.
