Chandrapur News : चंद्रपुरात २३ शाळकरी मुलींना तासभर डांबले स्वच्छतागृहात; सॅनिटरी नॅपकीनची विल्हेवाट न लावल्याने शिक्षा
चंद्रपूर; पुढारी वृत्तसेवा : चंद्रपूर शहरातील नटराज इंग्लिश स्कूलमध्ये सॅनिटरी नॅपकीनची विल्हेवाट न लावल्याने २३ शाळकरी मुलींना
तासभर स्वच्छतागृहात डांबल्याचा संतापजनक प्रकार उघडकीस आला आहे. त्यानंतर त्यांची सुटका झाल्यानंतर काही मुलींना अस्वस्थ, मळमळ, उलट्या झाल्याने पालकांनी संताप व्यक्त केला. या प्रकरणी शाळेच्या मुख्याध्यापिका श्रीमती सरकार यांच्यावर कारवाई करण्याची मागणी पालकांनी केली आहे. (Chandrapur News)
चंद्रपूर शहरात अष्टभुजा प्रभागात नटराज इंग्रजी शाळा आहे. यामध्ये शहरातील ठिकठिकाणच्या विद्यार्थिनी शिक्षण घेत आहेत. 3 नोव्हेंबरला शाळकरी मुलींनी सॅनिटरी नॅपकीनचा वापर केल्यानंतर त्यांची विल्हेवाट लावत नाही. या कारणासाठी शाळेच्या मुख्याध्यापिका श्रीमती सरकार यांनी अत्यंत निर्दयीपणे सातवी ते दहावीमधील २३ शाळकरी विद्यार्थिनींना शिक्षा म्हणून पूर्ण तासभर बाथरूममध्ये बंद केले. क्रूरता आणि निष्काळजीपणाच्या या कृत्यामुळे मुलींना तीव्र त्रास सहन करावा लागला. मुलींना स्वच्छतागृहातून बाहेर काढल्यानंतर काही मुलींना अस्वस्थ वाटू लागले. काहींना मळमळ होवून उलट्या देखील झाल्या. (Chandrapur News)
ही घटना मुलींनी शिक्षकांना सांगितली, तेव्हा त्यांना समर्थन आणि सहानुभूतीऐवजी हास्य आणि उपहासात्मक वागणूक मिळाली. त्यानंतर मुलींनी हा प्रकार आपल्या पालकांना सांगितला. त्यामुळे पालकांमध्ये प्रचंड संताप निर्माण झाला. सदर घटनेची माहिती युवासेना जिल्हाप्रमुख विक्रांत सहारे आणि युवती जिल्हाप्रमुख रोहिणी पाटील यांनी तातडीने हस्तक्षेप करत शाळेला भेट देऊन या लज्जास्पद कृत्याचा जाब विचारला.
मुख्याध्यापिका सरकार यांनी सुरुवातीला झालेल्या प्रकाराबाबत टाळाटाळ केली. परंतू युवा सेनेच्या रोषापुढे प्राचार्य सरकार यांना चूक मान्य केली. चंद्रपुरात घडलेल्या या संतापजनक घटनेची विक्रांत सहारे आणि रोहिणी पाटील यांनी, जिल्हाधिकारी, शिक्षणाधिकारी आणि जिल्हा पोलीस अधीक्षकांकडे तक्रार करणार आल्याची माहिती दिली. या बेजबाबदार वर्तनामुळे शाळेची मान्यता रद्द करून शाळा व्यवस्थापनावर गुन्हा दाखल करण्याची मागणी केली.
यावेळी युवासेना शहर प्रमुख शहबाज शेख, युवा सेना उपशहर प्रमुख संगदीप रामटेके, युवती सेना उपजिल्हाधिकारी धनश्री हेडाऊ, अनुष्का खनके, रोशनी गोल्डर,सूरज रॉय व गोविंदा असोपा उपस्थित होते.
हेही वाचा