यवतमाळ : अत्याचार करुन महिलेला विष पाजल्यामुळे पीडितेचा मृत्यू

यवतमाळ; पुढारी वृत्तसेवा : यवतमाळ तालुक्यातील एका गावात कामावर नेण्याच्या बहाण्याने दोन आरोपींनी एका महिलेला दारू पाजून तिच्यावर सामूहिक अत्याचार केल्याची घटना उघडकीस आली आहे. पीडितेला तिला विष पाजण्यात आले. त्यानंतर बेशुद्ध अवस्थेतील महिलेला पहाटे तिच्या घराजवळ आणून सोडण्यात आले. मात्र, तिची गंभीर अवस्था लक्षात घेऊन तिला यवतमाळ येथील जिल्हा रुग्णालयात दाखल करण्यात आले. मात्र उपचारादरम्यान तिचा मृत्यू झाला. पोलिसांनी याप्रकरणी खुनाचा गुन्हा दाखल करत दोघांना अटक केली आहे.

अण्णाराव भीमा धोत्रे व रामकिसन राजा शिंदे (वय ५५) असे पोलिसांनी अटक केलेल्या आरोपींची नावे आहेत. २३ जून रोजी  अण्णाराव धोत्रे व रामकिसन शिंदे या दोघांनी पीडित महिलेला कामावर नेण्याच्या बहाण्याने सोबत नेले. दुपारनंतर तिला घरी आणून सोडले. पुन्हा सायंकाळी तिला सोबत नेले. या नराधमांनी तिला दारू पाजून पहाटे ४.३० वाजेपर्यंत तिच्यावर पाशवी अत्याचार केला. त्यानंतर तिला विषारी औषध पाजले. त्यानंतर तिला बेशुद्ध अवस्थेत तिच्या घरी नेऊन सोडून गेले. तिच्या शरीरात विष गेल्याने ती तडफडत असल्याचे पाहून आजूबाजूच्या लोकांनी उपजिल्हा रुग्णालयात दाखल करण्यात आले.

२६ जून रोजी पीडित महिलेचा मृत्यू झाला. पोलिसांनी सोमवारी (दि. १० जुलै) अण्णाराव धोत्रे व रामकिसन शिंदे या दोघांनाही या प्रकरणी अटक केली.