यवतमाळ : ७० हजारांचे अनधिकृत बियाणे जप्त

यवतमाळ; पुढारी वृत्तसेवा : पांढरकवडा तालुक्यातील करंजी येथे कृषी विभागाने टाकलेल्या धाडीत ७० हजार २५० रुपयांचे अनधिकृत बियाणे जप्त करण्यात आले.

याबाबतच्या अधिक माहितीनुसार, पांढरकवडा पंचायत समितीचे कृषी अधिकारी तथा बियाणे निरीक्षक सुरेश चव्हाण यांना तालुक्यातील करंजी येथे पुरुषोत्तम चौधरी (रा. गणेशपूर, ता. पांढरकवडा) हे एका गादी पिंजनालयात अनधिकृत बियाणांची विक्री करीत असल्याची माहिती मिळाली. जिल्हा गुणनियंत्रक पथकातील जिल्हा परिषद कृषी अधिकारी पंकज बर्डे, किशोर अंबरकर, संजय वानखडे, संदीप वाघमारे व पोलीस पथकासह करंजी गावात पोहोचले. त्यानंतर या ठिकाणी झडती घेतली. या झडतीत त्यांना पांढऱ्या रंगाच्या नायलॉन पोत्यात बियाणांचे पाकीट आढळून आले.

त्यातील सर्व बियाणांचे पाकीट तपासले असता, यावेळी बाहुबली केजी २५, राशी ६५९, एटीएम, त्रिशूल ७६, वरील भागावर कॉटन सीड्स लिहिलेले, तसेच पाच जी लिहिलेले खालील बाजूला पिंक आर्ट चार लिहिलेले, तसेच त्रिशूल, ३०२८ लिहून असलेले विविध प्रकारचे ४७ अनधिकृत बियाणाचे पाकीट आढळून आले. याबाबत पंचायत समिती पांढरकवडाचे कृषी अधिकारी सुरेश चव्हाण यांनी पांढरकडा पोलिस ठाण्यात तक्रार दाखल केली असून आरोपीवर गुन्हा दाखल करण्यात आला आहे. अधिक चौकशी पांढरकवडा पोलिस करीत आहेत.