नागपूर, पुढारी वृत्तसेवा : नागपूर महानगरपालिकेच्या 'आपली बस' सेवेच्या ताफ्यात आणखी २५० बसेसचा समावेश होणार आहे. उप मुख्यमंत्री देवेंद्र फडणवीस यांनी याविषयीची घोषणा केली. सर्वसामान्यांच्या खिशाला परवडणारी पर्यावरणपूरक वातानुकूलित बस सेवा ही नागपूर शहरातील नव्या युगाची सुरूवात असल्याचे गौरवोद्गार केंद्रीय परिवहन, महामार्ग मंत्री नितीन गडकरी यांनी काढले.
नागपूर स्मार्ट सिटीद्वारे मनपाला प्रदान करण्यात आलेल्या वातानुकूलीत विद्युत बसेसचे लोकार्पण रविवारी सायंकाळी पार पडले. संविधान चौकात झालेल्या समारंभात विशेष अतिथी म्हणून आमदार प्रवीण दटके, आमदार कृष्णा खोपडे, मनपा आयुक्त तथा प्रशासक राधाकृष्णन बी., नागपूर स्मार्ट सिटीचे मुख्य कार्यकारी अधिकारी तथा मनपाचे अतिरिक्त आयुक्त अजय गुल्हाने, अतिरिक्त आयुक्त राम जोशी, गोंदिया जिल्ह्याचे जिल्हाधिकारी चिन्मय गोतमारे, माजी परिवहन समिती सभापती जितेंद्र (बंटी) कुकडे, उपायुक्त तथा परिवहन व्यवस्थापक रवींद्र भेलावे, अधीक्षक अभियंता मनोज तालेवार आदी मान्यवर उपस्थित होते.
यावेळी मनपा आयुक्त तथा प्रशासक राधाकृष्णन बी. यांच्या विद्युत बसेसची संख्या वाढविण्याच्या संकल्पनेचे उपमुख्यमंत्री फडणवीस यांनी समर्थन केले. २५० विद्युत बसेस खरेदी करण्यासाठी निधी उपलब्ध करून देण्याची घोषणा केली. मेट्रोप्रमाणेच 'आपली बस' कुठल्या बस स्थानकावर किती वेळेत पोहोचणार याची माहिती देणारे तंत्रज्ञान आत्मसात करण्याचे सूचित केले.
केंद्रीय मंत्री नितीन गडकरी यांनी मेट्रो व 'आपली बस'ची तिकीट एकाच कार्डवरून काढली जाईल, असे तंत्रज्ञान आत्मसात करण्याचे सूचित केले. भारत सरकारच्या 'स्क्रॅपिंग पॉलिसी' नुसार १५ वर्ष जुनी मनपातील सर्व वाहने 'स्क्रॅपिंग'मध्ये काढण्याचे त्यांनी निर्देशित केले. जेवढे जास्त 'स्क्रॅपिंग' होईल. तेवढे पर्यावरणाचे संरक्षण करता येईल व नवीन पर्यावरणपूरक वाहनांचा समावेश सुद्धा करून घेता येईल, असेही ते म्हणाले. नागपूर शहर प्रदूषणमुक्त करण्याच्या दिशेने विद्युत बस हे उत्तम पाउल आहे. लॉजिस्टिक हबच्या माध्यमातून नागपूर शहर स्वच्छ, सुदंर व प्रदूषणमुक्त होण्याकरिता फायदा होईल, असेही म्हणाले. नागपूर स्मार्ट सिटीकडून प्राप्त ४० विद्युत बसेस पाठोपाठ जूनपर्यंत आणखी १४४ विद्युत बसेस प्राप्त होणार आहेत. याशिवाय मोरभवन, हिंगणा आणि वाठोडा डेपोला अद्ययावत करण्यात येत असल्याचे मनपा आयुक्त राधाकृष्णन यांनी सांगितले.
