अमरावती : भरधाव ट्रकने दुचाकीस चिरडले, पती-पत्नी ठार; २ वर्षाची चिमुकली मात्र सुखरुप

अमरावती; पुढारी वृत्तसेवा : एका भरधाव ट्रकने समोरून जात असलेल्या दुचाकीस चिरडल्याने पती -पत्नी दोघेही जागीच ठार झाल्याची दुर्दैवी घटना गुरुवारी (दि.२ मार्च) दुपारी ३ वाजताच्या सुमारास घडली. देवरी फाट्याजवळील तेलाई नाल्याजवळ ही घटना घडली. सुदैवाने २ वर्षीय चिमुकला या अपघातातुन बचावला. या घटनेने मात्र सर्वत्र हळहळ व्यक्त होत आहे. विजय अण्णाजी शिंदे (२८) व ऋतुजा विजय शिंदे (२४) रा. जळका जगताप (ता. चांदुर रेल्वे जि. अमरावती) असे अपघातात ठार झालेल्या दाम्पत्याची नावे आहेत. तर देवांशु विजय शिंदे (२) हा चिमुकला जखमी असल्याची माहिती आहे.

विजय शिंदे त्यांची पत्नी ऋतुजा आणि चिमूकला देवांशु हे दुचाकीने (क्र.एम. एच. २७ ए. डब्ल्यू. ७४०१) जळका जगताप येथून देवरी येथे जाण्यासाठी निघाले. दुपारी ३ वाजताच्या दरम्यान ते शिराळा मार्गे देवरी येथे जात असताना त्यांच्या मागून कुटार घेऊन जाणारा भरधाव ट्रक (क्र.एम. एच. २७ बी.एक्स‌ ५०६६) अनियंत्रित झाल्याने दुचाकीला जबर धडक दिली. यामध्ये विजय आणि ऋतुजा हे दाम्पत्य जागीच ठार झाले. तर चिमुकला देवांशु हा जखमी झाला. आजूबाजूला असलेल्या नागरिकांनी तातडीने माहुली जहागीर पोलीस स्टेशनला माहिती दिली. माहिती मिळताच माहुली जहागीर पोलीस स्टेशन पीएसओ मिलिंद सरकटे, एएसआय टोकमुरके, एएसआय अघाडे, धर्माळे, पो कॉ विनोद वाघमारे हे घटनास्थळी दाखल झाले.

जखमी देवांशुला जवळ घेऊन दोन्ही मृतदेह रुग्णवाहिकेद्वारे जिल्हा सामान्य रुग्णालयात पाठवले तर देवांशुला उपचारासाठी दाखल करण्यात आले. घटनेचे वृत्त कुटुंबियांना कळताच रुग्णालयात एकच गर्दी झाली होती. पोलिसांनी ट्रक चालकावर गुन्हा दाखल केला असुन पुढील कार्यवाही सुरू असल्याची माहिती माहुली जहागीर पोलिसांनी दिली.

गुरुवारी घडलेल्या एका दुर्दैवी घटनेने दोन वर्षीय चिमुकल्याचे मात्र छत्र हरपले. आई वडिलांच्या अंगा खांद्यावर खेळणारा देवांशु मात्र आता कायमचा मातृपितृप्रेमाला पोरका झाला. आज त्यांच्या हुंदक्याला आवरायला आई आणि बाबा नसल्याने त्याने त्याची अवस्था पाहून मात्र इतरांना गहिवरून आले होते.