ठाणे : ग्रामीण भागातील जनतेला शुद्ध पाणीपुरवठा होण्यासाठी आणि गावकर्यांचे आरोग्य चांगले राखण्यासाठी 31 ऑक्टोबरपर्यंत सार्वजनिक जलस्रोतांचे सर्वेक्षण करण्यात येत आहे. या कालावधीत 431 ग्रामपंचायत परिसरातील 3 हजार 261 सार्वजनिक जलस्रोतांचे स्वच्छता सर्वेक्षण करण्याचे निर्देश आरोग्य विभागाला देण्यात आले आहेत.
ठाणे जिल्हा परिषदेच्या पाणी व स्वच्छता मिशन कक्षामार्फत पाणी गुणवत्ता सर्वेक्षण व सनियंत्रण कार्यक्रम राबविण्यात येत आहे. या कार्यक्रमांतर्गत पावसाळ्यापूर्वी व पावसाळ्यानंतर असे वर्षातून दोन वेळा स्त्रोतांचे स्वच्छता सर्वेक्षण करण्यात येते. जिल्हा परिषदेचे मुख्य कार्यकारी अधिकारी रोहन घुगे यांनी हे सर्वेक्षण वेळेत पूर्ण करण्याचे आदेश आरोग्य विभागास दिले आहेत.
जलजीवन मिशनचे प्रकल्प संचालक अतुल पारसकर यांच्या मार्गदर्शनाखाली ग्रामपंचायती मधील जलसुरक्षक, ग्रामपंचायत अधिकारी, आरोग्य सेवक यांच्यामार्फत सार्वजनिक स्त्रोतांच्या पिण्याच्या पाण्याचे स्वच्छता सर्वेक्षण करण्यात येत आहे. सर्व प्राथमिक आरोग्य केंद्राच्या वैद्यकीय अधिकारी यांच्यावर या सर्वेक्षणाची जबाबदारी आहे. या सर्वेक्षणाच्या निकषांनुसार तसेच स्त्रोतांच्या जोखिमेनुसार वर्गीकरण करून व ग्रामपंचायतींना लाल, हिरवे, पिवळे व चंदेरी कार्ड वितरित करण्यात आहे.
लाल कार्ड : ग्रामपंचायतींमधील 70 टक्केपेक्षा जास्त लोकसंख्या तीव्र जोखमींच्या स्त्रोतांवर अवलंबून असल्यास लाल कार्ड देण्यात येईल.
हिरवे कार्ड : ग्रामपंचायतीमधील 70 टक्केपेक्षा जास्त लोकसंख्या कमी जोखमीच्या स्त्रोतांवर अवलंबून असल्यास त्या ग्रामपंचायतीला हिरवे कार्ड देण्यात येते.
पिवळे कार्ड : ग्रामपंचायतीमधील 70 टक्केपेक्षा जास्त लोकसंख्या तीव्र जोखीम अथवा कमी जोखमीच्या स्त्रोतांवर अवलंबून नसल्यास त्या ग्रामपंचायतीस पिवळे कार्ड देण्यात येईल.
चंदेरी कार्ड : सलग पाच वर्षे साथीचा उद्रेक न झालेल्या व पाच वर्षे हिरवे कार्ड मिळालेल्या असे दोन्ही निकष पूर्ण करणार्या ग्रामपंचायतीस चंदेरी कार्ड देण्यात येईल.
तालुका पाण्याचे स्रोत
कल्याण 200
भिवंडी 890
अंबरनाथ 232
मुरबाड 812
शहापूर 1,127
एकूण 3,261
