सापाड (ठाणे) : राज्याचे उपमुख्यमंत्री आणि शिंदे गटाचे नेते एकनाथ शिंदे यांच्या विरोधात सोशल मीडियावर आक्षेपार्ह फोटो व्हायरल झाल्याची धक्कादायक घटना कल्याणमध्ये घडली आहे. या प्रकारामुळे शिवसेनेच्या शिंदे गटातील पदाधिकारी आणि कार्यकर्त्यांमध्ये तीव्र संताप पसरला आहे.
राज्याचे उपमुख्यमंत्री एकनाथ शिंदे यांच्याविरोधात सोशल मीडियावर अक्षेपार्ह फोटो आणि पोस्ट व्हायरल झाल्याने एकच खळबळ उडाली आहे. या आक्षेपार्ह पोस्टमुळे शिंदे गटाच्या शिवसैनिकांनी संतप्त प्रतिक्रिया व्यक्त करत पोलीस ठाण्यात धाव घेत संबंधित व्यक्तीच्या विरोधात
एफआयआर दाखल केली. ही पोस्ट रोहन पवार नावाच्या व्यक्तीने शेअर केल्याचे समोर आले आहे. रोहन पवार हा महाराष्ट्र नवनिर्माण सेनेचा पदाधिकारी असल्याची माहिती मिळाली आहे. त्याने उपमुख्यमंत्री एकनाथ शिंदे यांच्याबद्दल आक्षेपार्ह मजकूरासह फोटो सोशल मीडियावर शेअर केला होता. या प्रकारामुळे शिंदे समर्थकांत तीव्र नाराजी व्यक्त होत आहे. या प्रकाराची दखल घेत पोलीस प्रशासनाने आरोपीविरुद्ध एफआयआर दाखल केली आहे. पोलिसांनी आरोपीला तत्काळ अटक करून कायदेशीर कारवाई केली जाईल, असे आश्वासन दिले.
एकनाथ शिंदे आमचे दैवत आहेत. त्यांच्या विरोधात अशा प्रकारच्या पोस्ट आमच्या अस्मितेला ठेच पोहोचवणार्या आहेत. शिंदे साहेबांवर अक्षेपार्ह पोस्ट व्हायरल करणार्याला तत्काळ अटक झाली पाहिजे. आमच्या कार्यकर्त्यांची भावना दुखावली गेली आहे. आम्ही हे सहन करणार नाही.
स्वप्निल एरंडे, शिवसैनिक
