डोंबिवली : कल्याण पूर्वेतील एका माजी नगरसेविकेचा पती विजय गायकवाड व त्यांची पत्नी काही समस्येने त्रस्त होते. त्यातून बाहेर काढण्यासाठी तिघा बदमाशांनी त्यांना ज्योतिषाचा सल्ला घेण्याचा सल्ला दिला. त्यांना पूर्वेतील आडिवली भागातील एका बनावट ज्योतिषाकडे नेऊन तेथे कट रचून त्यांच्याकडे 20 लाख रूपयांची मागणी केली. त्यावेळी त्रिकुटाने त्यांच्याजवळील 27 हजारांची रोकड, 3 महागडे मोबाईल लुटून पळ काढला होता. या तिन्ही बदमाशांना मानपाडा पोलिसांनी अटक केली आहे.
एक आरोपी गिरीश खैरे याला घटना घडल्यानंतर पोलिसांनी तत्काळ अटक केली होती. तथापी दोन जण फरार झाले होते. आठवडाभराच्या तपासानंतर या दोघा फरार बदमाशांना मानपाडा पोलिसांनी तपासचक्रांना वेग देऊन चक्कीनाका भागातून अटक केली. गिरिश खैरे (50 ), विनयकुमार यादव (22, ) आणि विनायक कराडे (35) अशी अटक आरोपींची नावे आहेत. त्यांच्याकडून अडीच लाख रूपये, एका गावठी बनावटीचा कट्टा, जिवंत काडतूस आणि मोबाईल जप्त करण्यात आले आहेत. गायकवाड दाम्पंत्य काही समस्येने त्रस्त होते. विजय यांना आरोपी गिरिश खैरे यांना आपल्या परिचित एक ज्योतिषी आहे. त्यांना तुम्ही तुमचा हात दाखविला तर ते योग्य उपाय सांगतील असा सल्ला दिला. विजय यांना लुटण्याची ही संधी आहे असा विचार करून गिरीशसह इतर दोन जणांनी आडिवली भागात एक खोली भाड्याने घेतली होती. विजय यांना धमकावण्यासाठी विनयकुमार याने बिहारमधून एक रिव्हॉल्व्हर मागविले होते. प्लम्बर असलेल्या विनयकुमार याला ज्योतिषीचा पेहराव करून विजय गायकवाड यांच्या समोर उभे करण्याचे नियोजन आरोपींनी केले होते.
गिरीश खैरे आणि विनायक कराडे याने विजय गायकवाड यांच्या घरी जाऊन विजय यांचा अपघात झाला आहे, त्यामुळे तातडीने पैसे घेऊन या, असे त्यांच्या पत्नीला सांगितले. मुलगा आणि पत्नी निघाल्यावर आरोपींनी त्यांना एकानेच चला असे सांगितले. पत्नी आरोपींसोबत ज्योतिष खोलीत आली. तेव्हा मूळ घटनेचा उलगडा झाला. त्यानंतर आरोपी खोलीतून पळून गेले.
विजय गायकवाड यांंनी या घटनेनंतर मानपाडा पोलिस ठाण्यात तक्रार दाखल केली. पोलिसांनी गेल्या सात दिवसांत अहोरात्र शोध मोहीम राबवून तिन्ही आरोपींना अटक केली. ही कारवाई मानपाडा पोलिस ठाण्याचे वरिष्ठ पोलिस निरीक्षक विजय कादबाने यांच्या मार्गदर्शनाखाली गुन्हे प्रकटीकरण शाखेचे पोलिस निरीक्षक राम चोपडे, पोलिस निरीक्षक दत्तात्रय गुंड, सपोनि संपत फडोळ, सपोनि महेश राळेभात, सपोनि प्रशांत आंधळे यांच्यासह सपोउनि भानुदास काटकर, राजकुमार खिलारे, आदींच्या पथकाने केली आहे.
गेल्या महिन्यात गिरीश खैरे विजय गायकवाड यांना ज्योतिष बघण्यासाठी कल्याण-मलंगगड रोडला असलेल्या आडिवली गावात घेऊन गेला. तेथील इमारतीतल्या एका खोलीत ज्योतिषाचा वेष धारण करून प्लम्बर विनयकुमार बसला होता. खोलीत हात पाहण्याच्या बहाण्याने विजय गायकवाड यांना धमकावत रिव्हॉल्व्हर रोखून 20 लाखाची रक्कम मागितली. रक्कम मिळेपर्यंत खोलीतून सुटका होणार नाही असा दम भरला. विजय यांना खुर्चीला दोरीने बांधून ठेवले.
