ठाणे : ठाणे महानगरपालिकेला स्टेम प्राधिकरणाकडून होणारा पाणीपुरवठा शुक्रवारी सकाळी ९ वाजल्यापासून ते शनिवार सकाळी ९ वाजेपर्यंत बंद राहणार आहे.
या शटडाऊन कालावधीत स्टेम प्राधिकरण योजनेमधील देखभाल दुरुस्ती करणे व पिंपळास येथील शुद्ध पाणी वाहून नेणारी १५३० मि.मी व्यासाच्या जलवाहिनीवर गळती थांबविण्याची आवश्यक कामे करण्यात येणार आहेत. तसेच ठाणे महानगरपालिकेच्या पिसे व टेमघर शुद्धीकरण केंद्रातील उच्चदाब सबस्टेशन, पंपिग मशिनरीची तातडीची निगा, देखभाल, दुरुस्ती व इतर तातडीचे कामे करण्यासाठी महापालिका स्वतःच्या पाणी पुरवठा योजनेचा व मे. स्टेम प्राधिकरणाच्या योजनेचा २४ तासाचा शटडाऊन घेणे आवश्यक आहे.
परिणामी शुक्रवार २७ सप्टेंबरपासून सकाळी ९ ते शनिवार सकाळी ९ वाजेपर्यंत घोडबंदर रोड, लोकमान्यनगर, वर्तकनगर, साकेत, ऋतूपार्क, जेल, गांधीनगर, रुस्तमजी, सिद्धांचल, इंदिरानगर, रूपादेवी, श्रीनगर, समतानगर, सिद्धेश्वर, इटर्निटी, जॉन्सन, मुंब्रा व कळव्याच्या काही भागात २४ तासांसाठी पाणीपुरवठा पूर्णपणे बंद राहील.
सदर कपातीच्या कालावधीत नागरिकांनी पाणी काटकसरीने वापरून ठाणे महापालिकेस सहकार्य करावे, असे आवाहन करण्यात आले आहे.