डोंबिवली : कल्याण-डोंबिवली शहरांना लागून असलेल्या ग्रामीण पट्ट्यात ओल्या पार्ट्यांना ऊत आल्याचे पोलिसांनी केलेल्या कारवायांतून चव्हाट्यावर आले आहे. डोंबिवलीतील मानपाडा रोडला असलेल्या मातोश्री चायनिज ढाबा, कोळेगावातील आई एकविरा ढाबा आणि खोणी-तळोजा मार्गावरील चायना गार्डन अशा चायनिज वजा दारूच्या अड्ड्यांवर छापे टाकून तेथील चालक-मालकांच्या विरोधात फौजदारी कारवाई केली. मद्य विक्रीचा कोणताही परवाना नसताना चायनिज ढाब्यात ग्राहकांना बेकायदा दारू विक्री केल्याचा चालक-मालकांवर आरोप करण्यात आला आहे. पोलिसांनी या तिन्ही ढाब्यांच्या चालक-मालकांच्या विरोधात गुन्हे दाखल करण्यात आले आहेत.
या तिन्ही ढाब्यांमध्ये चवदार चायनिज आणि सोबत दारू मिळत असल्याने दिवस-रात्र या ढाब्यांवर ग्राहकांच्या उड्या पडलेल्या असतात. कल्याण-शिळ महामार्गासह काटई-बदलापूर पाईपलाईन, खोणी-तळोजा, कल्याण-मलंगगड रोड पट्ट्यात असलेल्या हॉटेल्स, ढाबे, बार अँड रेस्टॉरंट्सचा भरणा मोठ्या संख्येने आहे. दूरदूरच्या भागातून ग्राहक अशा हॉटेल्स आणि ढाब्यांवर श्रमपरिहारासाठी येतात. अशाच ढाब्यांपैकी मातोश्री, आई एकविरा आणि चायना गार्डनला मद्य विक्रीचा परवाना नसतानाही या ढाब्यांवर मद्य विक्री देखिल जोरात सुरू असल्याच्या तक्रारी मानपाडा पोलिस ठाण्याचे वरिष्ठ पोलिस निरीक्षक विजय कादबाने यांच्याकडे आल्या होत्या.
या तक्रारींची दखल घेत वपोनि विजय कादबाने यांनी सहाय्यक पोलिस निरीक्षक संपत फडोळ यांना कारवाईचे आदेश दिल्यानंतर पोलिसांनी दुपारच्या सुमारास या तिन्ही ढाब्यांवर अचानक छापे टाकले. सहाय्यक पोलिस निरीक्षक संपत फडोळ, हवालदार सोपान शेळके आणि पथकाने काटई-बदलापूर पाईपलाईन रोडला असलेल्या कोळेगावातील किशोर पाटील (रा. अंतर्ली) यांच्या आई एकविरा ढाब्यावर छापा टाकला. पोलिसांना ढाब्यात दारूचे ग्लास रिते करणारे ग्राहक आढळून आले. पोलिसांनी ढाबा मालक किशोर पाटील यांच्याकडे ढाब्यात दारू विक्री करण्यासाठी असलेली परवानगी तपासणीसाठी विचारली. तथापी किशोर पाटील दाखवू शकले नाहीत. चायनिज ढाब्याच्या नावाखाली ढाब्यात बेकायदा दारू विक्री केल्याच्या आरोपाखाली हवालदार सोपान शेळके यांनी सरकारतर्फे दिलेल्या फिर्यादीवरून ढाबा मालक कुंडलिक पाटील यांच्या विरूध्द महाराष्ट्र दारूबंदी प्रतिबंधक कायद्याने गुन्हा दाखल केला.
या कारवाईनंतर पथकाने खोणी-तळोजा मार्गावरील लोढा प्रवेशद्वार क्रमांक 3 समोर चायना गार्डन चायनिज ढाब्याचे मालक रूपेश भंडारी (रा. हेदुटणे) यांच्या ढाब्यावर छापा टाकाला. तेथेही बेकायदा दारू विक्री सुरू असल्याचे पोलिसांना आढळले. रूपेश यांच्याकडे दारू विक्रीचा परवाना नव्हता, त्यामुळे हवालदार अशोक आहेर यांनी सरकारतर्फे दिलेल्या फिर्यादीवरून रूपेश भंडारी यांच्या विरूध्द प्रतिबंधात्मक गुन्हा दाखल केला.
डोंबिवलीत पूर्वेकडील मानपाडा रोडला असलेल्या शिवसेना कार्यालयामागील जागेत प्रभाकर लिहे (रा. सोनारपाडा) हे मातोश्री चायनिज ढाबा चालवितात. या ढाब्यावर पोलिसांनी धाड टाकली. तेथेही त्यांना ढाब्यात विनापरवाना दारू विक्री सुरू असल्याचे आढळले. हवालदार विजय आव्हाड यांनी सरकारतर्फे दिलेल्या फिर्यादीवरून प्रभाकर लिहे यांच्या विरुध्द गुन्हा दाखल केला आहे. या कारवाईमुळे कल्याण-डोंबिवली परिसरातील चायनिजचे ढाबे, ठेले, हातगाड्यांवर बेकायदा दारू विक्री करत असल्याचे स्पष्ट झाले आहे. काही ढाब्यांवर रात्रीच्या वेळेत अंमली पदार्थांची विक्री करण्यात येत असल्याच्या तक्रारी आहेत.
