पनवेल : तळोजा मध्यवर्ती कारागृहातील शिपाई पदावर कार्यरत असलेल्या एका शिपायाच्या जेवण्याच्या डब्यात चक्क एमडीएमए हा अमली पदार्थ आढळल्याची धक्कादायक घटना समोर आली आहे. या अमली पदार्थाची किंमत जवळपास 10 लाख 8 हजार रुपये असल्याचे सांगितले जाते. या विरोधात खारघर पोलीस ठाण्यात गुन्हा दाखल करून त्याला अटक करण्यात आली आहे.
जयवंत जाधव (वय 38) हे तळोजा मध्यवर्ती कारागृहात हवालदार म्हणून कार्यरत आहेत. ते नेहमीप्रमाणे रात्रपाळीसाठी येणार्या कर्मचार्यांची नोंद तसेच तपासणी करून त्यांना सोडण्याचे काम हे करत होते. 9 ऑक्टोबर रोजी 5.45 च्या सुमारास कारागृहामध्ये रात्रपाळी कर्तव्याकरिता शिपाई अनिल असाराम जाधव 38 राहणार बांद्रा हा आला असताना जयवंत जाधव यांचे नाव नोंदणी करणे सुरू होते. यावेळी अनिल याची अंगझडती घेतली असता त्याच्या जेवणाच्या डब्याच्या पिशवीवर लव्ह फूड हेट वेस्ट असे नाव असलेल्या पिशवीमध्ये दोन प्लस्टिकचे डब्बे तसेच एक पारदर्शक जेवणाचा डब्बा, तसेच अन्य दोन डब्बे दिसून येत होते. या डब्याची तपासणी केली असता डब्यात संशयीत वस्तू जयवंत जाधव यांना आढळून आल्या. त्याची अधिक अंगझडती घेतली असता, त्या डब्यात 40 ग्रॅम वजनाचा गांजा, 23.87 वजनाचा चरस, 2.39 ग्राम वजनाचे पांढरे पूर्ण तसेच अर्धवट एमडीएमए तसेच गांजा ओढण्यासाठी पाच पट्ट्या या अंगझडतीत आढळून आले आहेत.
या सगळ्याची किंमत जवळपास 10 लाख 8 हजार रुपये किंमतीचा अंमली पदार्थ असल्याचे सांगितले आहे. हे सर्व पदार्थ कारागृहातील न्यायबंदी यांना सेवन करण्याकरिता पुरविण्याच्या उद्देशाने स्वतःच्या कब्जात ठेवल्याची शक्यता वर्तवली जात आहे. या प्रकरणी खारघर पोलीस ठाण्यात अनिल जाधव यांच्यावर गुन्हा दाखल केला आहे.
