डोंबिवली : महावितरणच्या टिटवाळा उपविभागात वीज चोरी करणाऱ्या वीज ग्राहकांवर सातत्याने कारवाई सुरू आहे. गेल्या महिन्यात टिटवाळ्यात वीज ग्राहकांच्या घरांच्या तपासणीत 87 जणांकडे 24 लाख 20 हजार रूपयांची वीज चोरी केल्याचे उघडकीस आले. या सर्व 87 जणांविरूद्ध वीज कायदा 2003 च्या कलम 135 नुसार मुरबाड पोलिस ठाण्यात वीज चोरीचा गुन्हा दाखल करण्यात आला आहे.
कल्याण परिमंडळाचे मुख्य अभियंता चंद्रमणि मिश्रा, कल्याण मंडळ दोनचे अधीक्षक अभियंता दिलीप भोळे, कल्याण ग्रामीण विभागाचे कार्यकारी अभियंता विनय काळे यांच्या मार्गदर्शनाखाली ही कारवाई करण्यात आली. मांडा-टिटवाळा शाखा कार्यालयांतर्गत टिटवाळ्याच्या महागणपती मंदिराचा परिसर, बल्याणी, बनेली आणि मांडा पश्चिम भागातील 40, तर गोवेली शाखेंतर्गत म्हारळ व वरप भागात 33 जणांकडे, तसेच खडवली परिसरात 14 जणांकडे वीज चोऱ्या आढळून आल्या.
वीज चोरीचे देयक व दंडाच्या रकमेचा भरणा टाळणाऱ्या या 87 जणांविरुद्ध दिलेल्या फिर्यादीनुसार मुरबाड पोलिसांनी गुन्ह्याची नोंद केली आहे. टिटवाळा उपविभागाचे उपकार्यकारी अभियंता गणेश पवार, सहाय्ययक अभियंते धनंजय पाटील, नीलेश शिर्के, तुकाराम घोडविंदे, कनिष्ठ अभियंते सचिन पवार, अलंकार म्हात्रे आणि त्यांच्या पथकाने ही कारवाई केली.
