कुडाळ : कुडाळ तालुक्यातील पाट तिठा (श्री माऊली मंदिर) येथे डम्पर व मोटारसायकल यांच्यात धडक होऊन झालेल्या भीषण अपघातात पाट हायस्कूलची दहावीतील विद्यार्थिनी मनस्वी सुरेश मेतर (16, रा. निवती मेढा, ता. वेंगुर्ले) हिचा डम्परखाली सापडून जागीच मृत्यू झाला. तर मोटारसायकलस्वार जखमी झाला. ही घटना रविवारी स. 6.40 वा. च्या सुमारास घडली. मनस्वी सोमवारी (दि.17) दहावीचा शेवटचा पेपर देणार होती. परंतु त्याआधीच तिच्यावर काळाने घाला घातला.
मनस्वीच्या दुर्दैवी अपघाती मृत्यूने पाट-निवती पंचक्रोशीत हळहळ व्यक्त होत आहे. दरम्यान, ग्रामस्थांनी निवती पोलीस ठाण्यात धडक देत या अपघाताला कारणीभूत ठरणार्यांवर गुन्हा दाखल करावा, अशी आक्रमक भूमिका घेतली. त्यानंतर अल्पवयीन मोटार- सायकलस्वार, त्याचे वडील व डम्पर चालक अशा तिघांवर पोलीस ठाण्यात गुन्हा दाखल करण्यात आल्याची माहिती निवती पोलीस ठाण्यातून देण्यात आली. याबाबतची खबर योगेश उल्हास मेतर (रा.निवती मेढा) यांनी निवती पोलीस ठाण्यात दिली.
वनविभागाचे अधिकारी सुरेश मेतर यांची मुलगी मनस्वी ही एस. एल. देसाई विद्यालय पाट या हायस्कूलमध्ये दहावी इयत्तेत शिकते. ती नेहमी एसटी बसने शाळेत जात असे. सध्या दहावीची परीक्षा चालू असून सोमवारी दहावीचा शेवटचा भूगोलचा पेपर होता. या विषयाच्या जादा वर्गासाठी ती हायस्कूलमध्ये क्लाससाठी जात होती. दरम्यान हुमरमळा येथील तिच्या ओळखीतील एका मुलाने तिला म्हापण येथे आपल्या मोटारसायकलवर घेतले. यानंतर ते दोघेही पाट तिठा येथून कुंभारवाडीमार्गे पाट हायस्कूलकडे निघाले. याच मार्गावर परुळे ते कुडाळ वाळू वाहतूक करणार्या डम्परची व मोटारसायकलची जोरदार धडक झाली. यात मोटरसायकल रस्त्यावर पडली मोटारसायकलस्वार व मागे बसलेली मनस्वी हे दोघेही रस्त्यावर फेकले गेले. यात मनस्वी दुर्दैवाने मागील चाकाखाली गेली.
