ठाणे : पुढारी वृत्तसेवा : एसटी महामंडळाचे अध्यक्ष कोण होणार यावरून गेली काही महिने अनेक घडामोडी सुरू होत्या. अखेर आज (दि.१०) महाराष्ट्र राज्य मार्ग परिवहन महामंडळाचे (एसटी) अध्यक्ष म्हणून परिवहन मंत्री प्रताप सरनाईक (Pratap Sarnaik) यांची नियुक्ती करण्यात आली आहे. सरनाईक हे एसटी महामंडळाचे २६ वे अध्यक्ष असतील. महाराष्ट्र शासन केंद्रीय अधिनियमान्वये तयार केलेल्या नियम व आदेशानुसार ही नियुक्ती करण्यात आली आहे. (MSRTC Chairman)
महाराष्ट्राच्या सर्वसामान्य जनतेची लोकवाहिनी असलेल्या एसटीला भविष्यात आर्थिक दृष्ट्या सक्षम करून एक चांगली दर्जेदार परिवहन सेवा निर्माण करण्यासाठी मी कटिबद्ध आहे, अशी प्रतिक्रिया परिवहन मंत्री प्रताप सरनाईक यांनी दिली आहे. तसेच आपल्याला या पदावर नियुक्त करून महाराष्ट्राच्या सर्वसामान्य जनतेची सेवा करण्याची संधी दिल्याबद्दल राज्याचे मुख्यमंत्री देवेंद्र फडणवीस तसेच उपमुख्यमंत्री एकनाथ शिंदे व उपमुख्यमंत्री अजित पवार यांचे त्यांनी आभार मानले आहेत.
१९६० मध्ये महाराष्ट्र राज्य मार्ग परिवहन महामंडळाची (एसटी महामंडळ) स्थापना करण्यात आली. र. गो. सरैय्या हे महामंडळाचे पहिले अध्यक्ष होते. त्यानंतर अनेक महत्त्वाच्या व्यक्तींनी एसटी महामंडळाचे अध्यक्षपद भूषविले आहे.
