मिरा रोड : मिरा-भाईंदर वसई-विरार पोलीस आयुक्तालयातील पहिल्या टप्प्यात 945 पोलीस पदांची भरती केल्यानंतर आता दुसर्‍या टप्प्यात 1082 पदे भरण्यास व त्यासाठी येणार्‍या खर्चास राज्याच्या गृहविभागाकडून मंजुरी देण्यात आली आहे.
1082 पदे भरण्यास मंजुरी मिळाल्यामुळे पोलीस आयुक्ता लयातील मनुष्यबळ वाढले जाणार असून मिरा-भाईंदर आणि वसई-विरार या दोन्ही शहरातील वाढती गुन्हेगारी रोखण्यास मोठी मदत होणार आहे.
ठाणे ग्रामीण व पालघर जिल्हा पोलिसांचे विभाजन करून 1 ऑक्टोबर 2020 रोजी मिरा-भाईंदर, वसई-विरार पोलीस आयुक्तालयाची स्थापना करण्यात आली. सद्या पोलीस आयुक्तालय कार्यक्षेत्रात 18 पोलीस ठाणे आहेत. सद्यस्थितीत पोलीस आयुक्तालयात 1735 पोलीस कर्मचारी व 358 पोलीस अधिकारी कार्यरत आहेत.
नवीन पद भरती करण्यास शासनाची मंजुरी मिळाली आहे. यामुळे पोलीस आयुक्तालयाला अतिरिक्त मनुष्यबळ मिळणार आहे. यामुळे जास्त नागरिकांपर्यंत पोहोचण्यास व यांच्या तक्रारीचे कमी कालावधीत निवारण करण्यास पोलिसांना मदत होणार आहे.
मधुकर पांडेय पोलीस आयुक्त, मिरा-भाईंदर, वसई-विरार पोलीस आयुक्तालय, ठाणे.
