Pahalgam Terrorist Attack | पहेलगाम हल्ल्या विरोधात बैलगाडा मैदानात
ठाणे : शुभम साळुंके
पहलगाम दहशतवादी हल्ल्याविरोधात डोंबिवलीत बैलगाडा संघटना रस्त्यावर उतरली आहे. हेदुटने गावाजवळ ठाणे, रायगड जिल्ह्यातील बैलगाडा चालकांनी रस्त्यावर उतरून पहलगाम हल्ल्याचा निषेध केला आहे.
पाकिस्तान विरोधात घोषणा देत शनिवार (दि.26) डोंबिवलीत निषेध करण्यात आला आहे. ठाणे रायगड जिल्ह्यातील शेकडो बैलगाडा चालक मालक डोंबिवलीतील हेदुटणे गावाजवळ एकत्र आले होते. हा हल्ला पाकिस्तान पुरस्कृत दहशतवाद्यांनी केला असून दहशतवाद्यांना पकडून कठोर शिक्षा द्यावी, अशी मागणी यावेळी करण्यात आली आहे.
काश्मीर मधील पहलगाम येथे दहशतवाद्यांनी पर्यटकांची गोळ्या झाडून हत्या केल्याच्या निषेधार्थ आज कल्याण तालुक्यातील हेदुटणे गावात ठाणे रायगड जिल्ह्यातील बैलगाडा मालक एकत्र आले होते. सर्व बैलगाडा मालकांनी एकत्र येऊन या हल्ल्यात मृत पावलेल्या पर्यटकांना श्रद्धांजली वाहिली. दहशतवाद्यांना आश्रय देणार्या पाकिस्तान विरोधात तीव्र घोषणाबाजी करून आपला संताप व्यक्त केला आहे. अखिल भारतीय बैलगाडा संघटनेचे अध्यक्ष संदीप माळी यांच्या नेतृत्वाखाली या आंदोलनाची हाक देण्यात आली होती. बैलगाडा मालकांनी देखील जनावरांना मैदानात घेऊन येत हल्ल्याचा निषेध केला आहे.
दहशतवादी हल्ल्यातील मृतांना बैलगाडा मालकांनी जनावरांवर पेंटिंग करून श्रद्धांजली अर्पण केली आहे. ठाणे रायगड जिल्ह्यातील बैलगाडा मालक यावेळी मोठ्या संख्येने उपस्थित असल्याचे चित्र दिसून आलं आहे. यावेळी बैलगाडा मालकांनी प्रचंड पाकिस्तान विरोधात घोषणाबाजी करत संताप व्यक्त केला आहे. तसेच केंद्र सरकारने सर्जिकल स्ट्राईक करून पाकिस्तानला जश्यास तस उत्तर देण्याची मागणी यावेळी करण्यात आली आहे.
