ठाणे : मध्य रेल्वेने येत्या रविवारी (दि.२७) विविध अभियांत्रिकी व देखभालीची कामे करण्यासाठी ठाणे आणि कल्याण स्थानकादरम्यान मेगा ब्लॉक जाहीर केला आहे. या दरम्यान काही लोकल गाड्या रद्द तर गाड्या वेळाने धावणार आहेत. रविवारी प्रवाशांनी घरातून निघताना रेल्वेचे वेळापत्रक तपासून प्रवास करावा, असे आवाहन रेल्वे प्रशासनाकडून करण्यात आले आहे.
ठाणे आणि कल्याण स्थानकांदरम्यान अप व डाऊन धीम्या मार्गावर ११.०० ते ४.०० वाजेपर्यंत हा मेगा ब्लॉक राहील. मुलुंड स्थानक येथून १०.४३ ते ३.५३ पर्यंत सुटणाऱ्या डाऊन धीम्या, अर्धजलद गाड्या, मुलुंड ते कल्याण दरम्यान डाऊन जलद मार्गावर वळविण्यात येतील. या गाड्या ठाणे, कळवा, मुंब्रा, दिवा आणि डोंबिवली स्थानकांवर थांबतील आणि आपल्या निर्धारित वेळेपेक्षा सुमारे १० मिनिटे उशिरा पोहोचतील.
कल्याण येथून १०.३६ ते ३.५१ पर्यंत सुटणाऱ्या अप धिम्या, अर्ध जलद गाड्या, कल्याण आणि मुलुंड स्थानकांदरम्यान जलद मार्गावर वळवल्या जातील. या गाड्या डोंबिवली, दिवा, मुंब्रा, कळवा आणि ठाणे स्थानकांवर थांबतील आणि मुलुंड स्थानकावर अप धिम्या मार्गावर पुन्हा वळवल्या जातील आणि नियोजित वेळेपेक्षा १० मिनिटे उशिरा पोहोचतील. ठाण्यासाठी उपनगरी गाड्या निर्धारित डाऊन धीम्या मार्गावर सुरू राहतील. छत्रपती शिवाजी महाराज टर्मिनस मुंबई येथून ११.०० ते पाच वाजेपर्यंत सुटणाऱ्या व तेथे येणाऱ्या सर्व अप व डाऊन धीम्या लोकल गाड्या सुमारे १० मिनिटे उशिराने पोहोचतील.
पनवेल येथून १०.३३ ते ५.०७ पर्यंत छत्रपती शिवाजी महाराज टर्मिनस मुंबई येथे जाणाऱ्या अप हार्बर मार्गावरील सेवा आणि छत्रपती शिवाजी महाराज टर्मिनस मुंबई येथून ०९.४५ ते ३.४४ पर्यंत पनवेल/बेलापूरकडे जाणाऱ्या डाऊन हार्बर मार्गावरील सेवा रद्द करण्यात येतील. पनवेल येथून ११.०२ ते ४.२६ पर्यंत ठाण्याकडे जाणाऱ्या अप ट्रान्स-हार्बर मार्गावरील सेवा आणि ठाणे येथून १०.०१ ते ४.२४ पर्यंत पनवेलकडे जाणाऱ्या डाऊन ट्रान्स-हार्बर मार्गावरील गाड्या रद्द राहतील. ब्लॉक काळात छत्रपती शिवाजी महाराज टर्मिनस-वाशी विभागात विशेष लोकल सेवा सुरू राहतील. ब्लॉक काळात ठाणे -वाशी/नेरुळ स्थानकांदरम्यान ट्रान्स-हार्बर मार्गावरील सेवा उपलब्ध असतील. हे देखभाल व मेगा ब्लॉक प्रवाशांच्या सुरक्षिततेसाठी अत्यावश्यक आहेत. त्यामुळे प्रवाशांनी सहकार्य करावे, असे आवाहन रेल्वे प्रशासनाने केले आहे.
