ठाणे : कल्याण उप-प्रादेशिक परिवहन कार्यालयाने २०२५-२६ या आर्थिक वर्षात तब्बल ४३७ कोटी ८० लाख रुपयांचा विक्रमी महसूल शासनाच्या तिजोरीत जमा करत उल्लेखनीय यश संपादन केले आहे. वर्षभरात एकूण १ लाख ८ हजार १२५ वाहनांची नोंदणी करण्यात आली.
विशेष म्हणजे, शासनाने दिलेल्या उद्दिष्टापेक्षा १०० टक्क्यांहून अधिक महसूल वसुली करण्यात कार्यालयाला यश आले आहे, अशी माहिती उप-प्रादेशिक परिवहन अधिकारी आशुतोष बारकुल यांनी दिली.
उप-प्रादेशिक परिवहन कार्यालयाला प्राप्त महसुलामध्ये सर्वाधिक हिस्सा वाहन नोंदणीमधून मिळाला आहे. यामध्ये ७९ हजार ५५७ दुचाकी, १६ हजार ८२६ चारचाकी, ३ हजार ५७१ ऑटोरिक्षा, ४ हजार २९२ मालवाहू वाहने, तसेच प्रवासी व इतर वाहनांचा समावेश आहे.
मागील वर्षाच्या ३७२ कोटी २२ लाख रुपयांच्या महसुलाच्या तुलनेत यंदा तब्बल ४३७ कोटी ८० लाख रुपयांची लक्षणीय वाढ नोंदविण्यात आली आहे. ही कामगिरी कार्यालयातील सर्व अधिकारी व कर्मचाऱ्यांच्या समन्वयपूर्ण मेहनतीचे फलित असून, या यशामुळे कार्यालयाचे सर्वत्र कौतुक होत आहे.
