कल्याण : गेल्या काही दिवसांपासून कल्याण-डोंबिवलीच्या शहर आणि ग्रामीण पट्ट्यात सुरू असलेल्या अतिवृष्टीने जनजीवन विस्कळित केले असतानाच, आता धोकादायक झाडांचा प्रश्नही गंभीर बनला आहे. कल्याण पूर्वेकडील लोकग्राम परिसरातील कावेरी इमारतीच्या आवारात एक जुने महाकाय झाड कोसळल्याची घटना घडली. या दुर्घटनेत इमारतीचे मोठे नुकसान झाले असून, प्रशासनाच्या मान्सूनपूर्व नियोजनावर पुन्हा एकदा प्रश्नचिन्ह उपस्थित झाले आहे.
अतिवृष्टी आणि सोसाट्याच्या वाऱ्यामुळे झाडाचा समतोल ढासळला. झाडाचे वजन आणि पावसाचा जोर सहन न झाल्याने ते थेट इमारतीच्या लोखंडी सुरक्षा कठड्यावर आणि गेटवर कोसळले. या अपघातात लोखंडी गेटचा अक्षरशः चक्काचूर झाला असून, इमारतीची सुरक्षा भिंतही जमीनदोस्त झाली आहे. झाडाचा मोठा पसारा लगतच्या रस्त्यावर आल्याने काही काळ वाहतुकीलाही मोठा अडथळा निर्माण झाला होता.
दरवर्षी पावसाळ्यापूर्वी कल्याण-डोंबिवली महानगरपालिका (केडीएमसी) प्रशासनाकडून झाडांची छाटणी आणि धोकादायक झाडे हटवल्याचा दावा केला जातो. मात्र, या घटनेमुळे प्रशासनाचे दावे केवळ कागदावरच असल्याचे पुन्हा एकदा सिद्ध झाले आहे. जर वेळेवर झाडांच्या धोकादायक फांद्या छाटल्या असत्या, तर ही दुर्घटना सहज टाळता आली असती, असा आरोप स्थानिक रहिवाशांनी केला आहे. प्रशासनाच्या या निष्काळजीपणामुळे नागरिकांमधून तीव्र संताप व्यक्त होत आहे.
सुदैवाने ज्या वेळी हे महाकाय झाड कोसळले, त्या वेळी परिसरातून कोणीही रहिवासी किंवा पादचारी ये-जा करत नव्हते. त्यामुळे मोठी जीवितहानी टळली आहे. मात्र, नेहमी गजबजलेल्या या परिसरात घडलेली ही घटना अत्यंत गंभीर असून, केडीएमसी प्रशासनाने कल्याण-डोंबिवलीच्या शहर आणि ग्रामीण पट्ट्यातील इतर धोकादायक झाडांची तातडीने पाहणी करून योग्य ती पावले उचलावीत, अशी मागणी आता स्थानिक रहिवाशांकडून केली जात आहे.
