डोंबिवली : कमरेला घोडा लावून खाकी वर्दीचा रूबाब दाखवत फुशारक्या मारणार्या एका पठ्ठ्याला कल्याणच्या खडकपाडा पोलिसांनी गौरीपाड्यातून जेरबंद केले. पोलीस अधिकारी असल्याची बतावणी करणार्या या आरोपीकडून पोलिसांनी गावठी कट्ट्यासह पोलिसी गणवेश हस्तगत केला आहे. या आरोपीने पोलीस असल्याची बतावणी करून गुन्हे केल्याचा पोलिसांचा कयास आहे. पोलिसांनी त्यादिशेने तपासचक्रांना वेग दिला आहे.
सनीकुमार विजय पाल ऊ र्फ चौहाण (19, रा. बाबडी म्हात्रे चाळ, मिलिंद नगर, कल्याण-पश्चिम) असे अटक करण्यात आलेल्या आरोपीचे नाव आहे. कल्याण कोर्टात हजर केले असता कोर्टाने त्याला अधिक चौकशीसाठी पोलिस कोठडीत ठेवण्याचे आदेश दिले आहेत.
पोलीस ठाण्यांच्या हद्दीतील अवैद्य धंदे करणार्या, विनापरवाना अग्निशस्त्र बाळगणार्या, अमली पदार्थ तसेच प्रतिबंधीत पदार्थांचा साठा/वितरण/विक्री करणार्या आरोपींवर कठोर कारवाईचे जिल्ह्याचे शहर पोलीस आयुक्त आशुतोष डुंबरे यांनी फर्मान सोडले आहे. त्यानुसार पोलीस उपायुक्त अतुल झेंडे यांच्या नेतृत्वाखाली कल्याण-डोंबिवलीतील आठही पोलीस ठाण्यांनी कारवायांच्या मोहिमांना वेग दिला आहे. अशातच कल्याणात खडकपाडा पोलिसांच्या हाती कट्टाधारी तोतया पोलीस अधिकारी लागला आहे.
कल्याण पश्चिमेकडील गौरीपाडा परिसरामध्ये एक इसम अग्निशस्त्रे घेऊन येणार असल्याची खबर खासगी गुप्तहेरांकडून मिळाली होती. त्यानुसार वरिष्ठ पोलीस निरीक्षक डॉ. अमरनाथ वाघमोडे यांनी गुन्हे प्रकटीकरण पथकाचे प्रमुख सपोनि विजय गायकवाड यांच्या नेतृत्वाखाली पथकाने गौरीपाडा परिसरात फिल्डिंग लावली. एका ठिकाणी एक इसम संशयास्पदरित्या घुटमळताना आढळून आला. चौकशी दरम्यान सनीकुमार पाल उर्फ चौहाण असे नाव त्याने सांगितले. त्याच्याकडून 25 हजार रुपये किमतीचा गावठी बनावटीचा लोखंडी कट्टा हस्तगत करण्यात आला.
आरोपीकडे चौकशी केली असता त्याच्याकडे सापडलेल्या वस्तू पाहता त्याच्याकडे पोलीस अधिकार्याचे दोन युनिफॉर्म आढळून आले. युनिफॉर्मच्या शर्टच्या दोन्ही खांद्यावर एक-एक स्टार, निळ्या व लाल रंगाची रिबीन, स्टीलचे दोन मपो, शर्टच्या डाव्या दंडावर महाराष्ट्र पोलीसचा कापडी बॅच, खाकी रंगाचे लाईनयार्ड, त्याखाली काळ्या रंगाची शिट्टी, शर्टच्या डाव्या दंडावर महाराष्ट्र पोलीसचा कापडी बॅच आढळून आला. आरोपीच्या विरोधात गुन्हा दाखल करण्यात आला आहे.
