कल्याण: आषाढी एकादशीच्या तोंडावर महाराष्ट्राच्या वारकरी परंपरेचा जागतिक स्तरावर गौरव करणारा अनोखा उपक्रम कल्याणातील पॅराजंपर आणि स्कायडायव्हर अजित बळीराम कारभारी यांनी साकारला.
कुस्तीपटू बळीराम कारभारी यांचे सुपुत्र असलेल्या अजित कारभारी यांनी ६ जुलै रोजी रशियामध्ये तब्बल १२,००० फूट उंचीवरून पॅराशूट जंप करताना वारकरी संप्रदायाचा पारंपरिक पेहराव धारण केला.
हवाई जहाजातून उडी घेतल्यानंतर त्यांनी 'राम कृष्ण हरी' तसेच श्री विठ्ठलाच्या प्रतिमेचा ध्वज आकाशात अभिमानाने फडकावत जगभरातील विठ्ठल भक्तांना प्रेरणादायी संदेश दिला.
या साहसी मोहिमेसाठी अजित कारभारी यांना रशियन मिलिटरीचे मुख्य प्रशिक्षक कोस्त्या क्रीवोत्सिव यांचे विशेष प्रशिक्षण लाभले.
या उपक्रमामागे केवळ साहस नव्हते, तर समाजाला भक्तीचा आणि सकारात्मकतेचा संदेश देण्याचा व्यापक उद्देश होता. महाराष्ट्राच्या आध्यात्मिक परंपरेला जागतिक व्यासपीठावर पोहोचविण्याचा हा एक प्रेरणादायी प्रयत्न मानला जात आहे.
