ठाणे: डोंबिवलीजवळच्या उंबार्ली गावात प्रॉपर्टी ब्रोकरची हत्या

डोंबिवलीपासून काही किमी अंतरावर असलेल्या मानपाडा-उंबार्ली रोडला संजय भोईर कुटुंबासह राहतात. संजय भोईर जमीन खरेदी-विक्रीच्या व्यवहारात ब्रोकरचे काम करत होते. शुक्रवारी रात्री सव्वा दहाच्या सुमारास भोईर यांचा मृतदेह उंबार्ली गावाजवळ असलेल्या मामाश्री ढाब्याच्या पाठीमागच्या निर्जन रस्त्यावर पडलेला आढळून आला. या घटनेची माहिती कळताच मानपाडा पोलिस घटनास्थळी दाखल झाले. पोलिसांनी घटनास्थळाचा पंचनामा केल्यानंतर संजय भोईर यांचा मृतदेह उत्तरीय तपासणीसाठी केडीएमसीच्या शास्त्रीनगर हॉस्पिटलकडे पाठवून दिला.

या संदर्भात संजय भोईर यांचा मुलगा राहूल भोईर (वय 22) याच्या जबानीवरून पोलिसांनी अज्ञात मारेकऱ्यांच्या विरोधात गुन्हा दाखल केला आहे. रात्री साडेनऊच्या सुमारास आपले वडील संजय हे त्यांच्या एम एच 05 /सी एफ/8992 क्रमांकाच्या स्कूटरवरून कुठेतरी गेले. रात्री उशिरापर्यंत घरी परतले नाही म्हणून त्यांच्या मोबाईलवर कॉल केला, तेव्हा पानटपरीवरून घरी येतो असे सांगितले. मात्र काही वेळाने गावातील तरूणाने फोन करून संजय भोईर हे मामाश्री ढाब्याच्या पाठीमागे उंबार्ली गावाकडे जाणाऱ्या रस्त्यावर जखमी अवस्थेत पडलेल्याचे सांगितले. त्यांच्या डोक्यावर कोणत्यातरी धारदार हत्याराने वार केल्याचे आढळून आले. घटनास्थळी पोहोचलेल्या राहुल याने त्याचे चुलते विजय भोईर यांच्या मदतीने जखमी वडील संजय यांना डोंबिवली एमआयडीसीच्या निवासी विभागातील एम्स हॉस्पीटलमध्ये नेले. तथापी तेथील डॉक्टरांनी तपासून त्यांना मृत घोषित केले.