टेंभुर्णी : अवैध वाळू तस्करीमुळे दोन-तीन गावे ॲक्शन मोडवर असून आम्ही वाळू उपसा करतो याची नावे पोलिसांना का सांगतो यावरून अकोले-खुर्द येथील ॲड पांडुरंग कुबेर तोडकर यांना वाळू तस्कराकडून झालेल्या निर्घृण मारहाणीच्या घटनेचा ग्रामस्थांच्या वतीने निषेध करण्यात आला. तसेच वाळू उपसा बंदीचा विशेष ग्रामसभेत ठराव करण्यात आला आहे.
अकोले-खुर्द येथील ॲड पांडुरंग कुबेर तोडकर यांना वाळू व्यवसाय करणाऱ्याकडून लोखंडी अँगल, लाकडी दांडके, दगड याने अत्यंत निर्घृणपणे मारहाण करण्यात आली होती.या मारहाणीत ॲड पांडुरंग कुबेर यांचे पाय व हात चार ठिकाणी फ्रॅक्चर झाले होते.ही घटना 3 डिसेंबर रोजी सकाळी 8 च्या सुमारास टेंभुर्णी हद्दीत घडली होती. या निर्घृण मारहाणीचे तीव्र पडसाद परिसरातील गावातून उमटले होते.
अकोले-खुर्द व फुटजवळगाव ग्रामपंचायतीने तातडीने या घटनेची गंभीर नोंद घेऊन ग्रामपंचायत हद्दीत वाळू उपसा बंदीचा ठराव ग्रामसभेत सर्वांच्या वतीने मंजूर केला. या ग्रामसभे वेळी नदीकाठच्या गावातील अवस्था बिहारपेक्षा कठीण झाली असल्याची मते नोंदविण्यात आली.तसेच आरोपीवर तातडीने कारवाई करावी अशी मागणी ही करण्यात आली.हे निवेदन टेंभुर्णी पोलिसांना देण्यात आले आहे.या घटनेच्या अनुषंगाने माढा येथील माढा बार असोशिएनच्या वतीने तीव्र निषेध नोंदविण्यात आला.तसेच माढा न्यायालयात माढा बार असोसिएशनच्या वतीने दोन दिवस काम बंद आंदोलन करण्यात आले होते. पंढरपूर न्यायालयात ही काम बंद आंदोलन करण्यात आले.
