तुळजापूर : श्री तुळजाभवानी माता छत्रपती शिवरायांना भवानी तलवार देतानाचा 108 फूट उंचीचा भव्य पुतळा, दिव्यांग, वृद्ध भाविकांसाठी मंदिराच्या मुख्य महाद्वाराजवळ मोठी लिफ्ट बसवून त्या माध्यमातून खाली उतरल्यावर भुयारी मार्गाने थेट मंदिराजवळ पोहोचता येईल, अशी विकास कामे तुळजापूर विकास आराखड्यांतर्गत करण्यात येणार असल्याची माहिती आ. राणाजगजितसिंह पाटील यांनी दिली.
मंदिर परिसराच्या संभाव्य विकास आराखड्याला मूर्त स्वरूप देण्यात येत असून सुमारे 1800 कोटी रुपयांच्या महत्त्वाकांक्षी योजनेला आता गती मिळणार आहे. येत्या 15 दिवसांत सर्व संबंधित विभागांकडून कालबद्ध नियोजन प्रणाली सादर करण्याचे निर्देश यंत्रणांना देण्यात आल्याची माहिती आ. पाटील यांनी दिली.
केंद्रांची निविदा प्रक्रिया अंतिम टप्प्यात असून, भविष्यात महाद्वारातून थेट दर्शन मंडपात कसे पोहोचता येईल याचे नियोजन करण्यात येणार आहे. भौगोलिक अडचणी लक्षात घेऊन दर्शन मंडपाचे डिझाईन आणि तांत्रिक प्रक्रिया सुरू असल्याचेही आ. पाटील यांनी स्पष्ट केले.
