कामती : मोहोळ तालुक्यातील इंचगाव परिसरात मोठ्या प्रमाणात टोमॅटोची लागवड करण्यात आली असून सध्या बाजारभावात मोठी घसरण झाल्याने टोमॅटो उत्पादक शेतकरी आर्थिक संकटात सापडले आहेत. पावसाचे प्रमाण कमी असताना पाण्याचा खर्च करून टोमॅटोचे पीक जोपासले; मात्र बाजारात अपेक्षित दर मिळत नसल्याने उत्पादन खर्चही भरून निघणे अवघड झाले आहे.
सोलापूर जिल्ह्यात यंदा पावसाच्या स्थितीचा परिणाम शेतीवर झाला आहे. जूनमध्ये जिल्ह्यात सरासरीच्या तुलनेत पावसाची तूट नोंदवण्यात आली होती. त्यामुळे अनेक भागांत शेतकऱ्यांना उपलब्ध पाण्यावर पिके सांभाळावी लागत आहेत. मोहोळ तालुक्यातही पाण्याचा वापर करून टोमॅटोचे पीक घेतलेल्या शेतकऱ्यांना आता बाजारभावाच्या संकटाला सामोरे जावे लागत आहे.
सोलापूर जिल्ह्यातील मोडनिंब बाजारपेठेत सध्या टोमॅटोची मोठी आवक होत असून दररोज सुमारे २५ हजार क्रेट म्हणजेच ६२५ टनांपेक्षा जास्त टोमॅटोची आवक होत असल्याचे वृत्त आहे. मागणीच्या तुलनेत आवक वाढल्याने बाजारभावावर दबाव आला असून टोमॅटोचे दर घसरले आहेत. २२ ते २३ ऑगस्टच्या उपलब्ध बाजारभावानुसार सोलापूर जिल्ह्यातील विविध बाजारपेठांमध्ये टोमॅटोला साधारण ८ ते १० रुपये किलोच्या आसपासचे मोडल दर नोंदले गेले. मंगळवेढा बाजारात २३ ऑगस्टला ९ रुपये किलो, तर अकलूजमध्ये २२ ऑगस्टला ८ रुपये किलो मोडल दर होता.
टोमॅटो लागवडीसाठी रोपे, खते, औषधे, मजुरी, पाणी आणि वाहतूक यावर मोठा खर्च होतो. त्यातच पावसाचे प्रमाण कमी असल्याने सिंचनाचा अतिरिक्त खर्च करावा लागत आहे. मात्र बाजारात कमी दर मिळत असल्याने शेतकऱ्यांच्या हातात अपेक्षित उत्पन्न राहात नसल्याचे चित्र आहे.
