सोलापूर : जिल्हा परिषदेतील विविध विषय समित्यांच्या सदस्यांची निवड होणार आहे. त्यासाठी भाजपचे सदस्य आपल्या नेत्यांकडे लॉबिंग करत असून अर्थ व बांधकाम, आरोग्य व शिक्षण आणि समाजकल्याण समितीचे सदस्य होण्यासाठी जिल्हा परिषदेचे सदस्य धडपड करत असल्याची माहिती समोर येत आहे.
जिल्हा परिषदेच्या विषय समिती सदस्य निवडण्यासाठी जिल्हा परिषदेचे अध्यक्ष दीपक वैद्य, मुख्य कार्यकारी अधिकारी कुलदीप जंगम यांच्या सूचनेने प्रशासन विभागाच्या उपमुख्य कार्यकारी अधिकारी स्मिता पाटील यांनी बुधवार, दि. 15 एप्रिलला दुपारी दोन वाजता जिल्हा परिषदेच्या यशवंतराव चव्हाण सभागृहात विशेष सभा होणार असल्याची नोटीस सदस्यांना बजावली. त्यानंतर महत्त्वाच्या विषय समितीच्या सदस्यपदी वर्णी लागावे, यासाठी सदस्यांकडून धडपड सुरू झाली आहे.
