सोलापूर : पुण्यश्लोक अहिल्यादेवी होळकर सोलापूर विद्यापीठाचा युवा महोत्सव २८ सप्टेंबरला बार्शी येथे रंगणार आहे. काही दिवसांचा कालावधी शिल्लक असल्याने विविध महाविद्यालयांमध्ये तयारीला वेग आला आहे. अनेक विद्यार्थी या कलाविश्वात रंगून गेल्याचे चित्र विविध महाविद्यालयात आहे.
युवा महोत्सवात बाजी मारण्यासाठी प्रत्येक महाविद्यालयातून जोरदार तयारी सुरू आहे. अनेक ठिकाणी सकाळी ७ ते रात्री १० वाजेपर्यंत सराव सुरू आहे. यंदाच्या महोत्सवात ३९ कला प्रकारांमध्ये ४० हून अधिक विद्यार्थी सहभागी होणार असल्याचे सांगण्यात आले.
विद्यार्थ्यांना सरावासाठी आवश्यक जागा, साहित्य तसेच मार्गदर्शनासाठी प्रशिक्षक आणि कोरिओग्राफरची नियुक्ती करण्यात आली आहे. प्रत्येक कला प्रकारातील सादरीकरण अधिक प्रभावी व्हावे, यासाठी विद्यार्थी आणि मार्गदर्शकांकडून विशेष मेहनत घेतली जात आहे. महोत्सवाच्या पार्श्वभूमीवर कॉलेज परिसरातही उत्साहाचे वातावरण आहे.
येथील संगमेश्वर कॉलेजला गेल्या काही वर्षांपासून विजेतेपदाने हुलकावणी दिली आहे. त्यामुळे यंदा विजेतेपद मिळविण्याचा निर्धार विद्यार्थ्यांनी केला आहे. त्यासाठी नियोजनबद्ध तयारी सुरू आहे. सरावातील बारकावे, सादरीकरणातील अचूकता आणि सांघिक समन्वयावर विशेष भर देण्यात येत आहे.
