सोलापूर : सोलापूर महानगरपालिकेची प्रभाग रचना बुधवारी प्रसिद्ध झाली. प्रत्येकी चार सदस्यांचे एकूण 26 प्रभाग असून ही प्रभाग रचना करताना कोणतीही प्रगणक गट फोडण्यात आले नाहीत. 2017 ची जैसे थै ठेवल्याने ही प्रभाग रचना सत्ताधारी भाजपसाठी फायदेशीर असल्याची चर्चा आहे. भाजपचे अनेक नगरसेवक या रचनेमुळे सेफ झोनमध्ये गेेले आहेत. त्यामुुळे सत्तेत असून ही शिवसेना (एकनाथ शिंदे गट) आणि राष्ट्रवादी (अजित पवार) यांची कोंडी होण्याची शक्यता आहे.
2017 मध्ये चार प्रभाग सदस्य रचना भाजपसाठी फायदेशीर ठरली होती. भाजपचे तब्बल 49 नगरसेवक निवडून आले होते. शिवसेना 21, काँग्रेस 14, एमआयएम 9, राष्ट्रवादी आणि बसपचे प्रत्येकी 4, माकपचा एक असे संख्याबळ होते. भाजपच्या आजी-माजी नगरसेवकांच्या चेहर्यांवर हसू आहे. भाजपसाठी शहरातील वातावरण पोषक आहे. पूर्वी दोन आमदार होते. आता शहर मध्य विधानसभा मतदारसंघातही भाजपचा आमदार झाल्याने भाजपची ताकद वाढली आहे. प्रभाग रचना अनुकूल असल्याने इतर पक्षातून इनकमिंग सुरूच आहे. परिणामी, पक्षाची ताकद वाढली आहे.
एकहाती सत्तेसाठी भाजपची व्यूहरचना...
महापालिकेवर भाजपची एकहाती सत्तास्थापना करण्याची व्यूहरचना आखली जात आहे. चार सदस्य प्रभाग रचना भाजपासाठी फलदायी असल्याचे यापूर्वीही निष्पन्न झाले. स्थानिक पातळीवर महायुती नको असा सूर भाजपचे स्थानिक नेते काढत आहे. महाविकास आघाडीचा निवडणुकीत कस लागण्याची शक्यता आहे.
