मोडनिंब : ज्ञानोबा-तुकारामांचा जयघोष, टाळ-मृदंगाचा गजर आणि वारकऱ्यांच्या उत्साहात संत शिरोमणी सावता महाराज यांच्या अरणमध्ये (ता. माढा) बुधवारी श्रीफळ हंडी सोहळा चांगलाच रंगला. ७३१ व्या पुण्यतिथीच्या या सोहळ्यासाठी जिल्ह्यासह राज्यातील भक्तांनी मोठ्या संख्येने उपस्थिती लावली होती.
जगद्गुरू तुकाराम महाराज यांचे वंशज बाळासाहेब महाराज देहूकर यांच्या घराण्याला श्रीफळ हंडी फोडण्याचा मान आहे. या परंपरेनुसार बाळासाहेब देहूकर व त्यांच्या कुटुंबातील सदस्यांनी श्रीफळ हंडी फोडली. यावेळी काल्याचे कीर्तनही झाले.
पंढरपूर येथून आलेली विठुरायाची पालखी व संत सावता महाराज यांच्या पालखीसमोर श्रीफळ हंडी सोहळा रंगला. दहीकाल्याच्या हंडीभोवती भाविकांनी श्रद्धेने तर काहींनी नवसाचे नारळ बांधले. हरिभाऊ गिड्डे, नागनाथ गिड्डे या मानकऱ्यांच्या घरून समारंभपूर्वक हंडी आणून पारावर बांधण्यात आली.
