सोलापूर : महिला व नवजात शिशू रुग्णालयातील ॲनोमली सोनोग्राफी केंद्र बंद आहे. यामुळे, सोनोग्राफी करण्यासाठी रूग्णांना खासगी केंद्रात जावे लागते. तेथे अडीच हजार रुपये द्यावे लागते. तर या सोनोग्राफीसाठी शासनाकडून गरोदर मातेला फक्त हजार रुपये अनुदान दिले जाते. मात्र, प्रत्यक्षात गरोदर मातेला व त्यांच्या नातेवाईकांना पदरचे दीड हजार रुपये द्यावे लागते. दीड हजार रुपये वाचण्यासाठी येथील महिला व नवजात शिशु रुग्णालयात सोनोग्राफी यंत्रणा सुरू करण्याची गरज आहे.
ॲनोमली सोनोग्राफीद्वारे गर्भातील बाळाची व्यंगाची तपासणी केली जाते. ती केल्यानंतर या अहवालातून गर्भातील बाळांमध्ये कोणते गंभीर व्यंग आहे का, हेही कळते. म्हणूनच ही सोनोग्राफी प्रत्येक गरोदर महिलेची केली जाते. अलिकडे सर्वच गरोदरमातेची ही तपासणी करण्यात येते. हे रुग्णालय महिला आणि नवजात शिशु यांचेच असल्याने येथे ॲनोमली या आधुनिक सोनोग्राफी मशीनची गरज आहे. यासाठी रुग्णालय जिल्हा प्रशासनाकडून देखील गतीने प्रयत्न होणे गरजेचे आहे.
