सोलापूर : शहरातील १६ केंद्रांवर नीटची फेरपरीक्षा कडक सुरक्षेत व शांततेत पार पडली. पेपरफुटीच्या पार्श्वभूमीवर परीक्षा केंद्रांवर सीआयएसएफ व पोलिसांचा बंदोबस्त होता. सोशल मीडियावर करडी नजर ठेवण्यात आली होती. परीक्षेसाठी एकूण ५ हजार ९४७ विद्यार्थ्यांची नोंदणी केली होती. त्यापैकी ५ हजार ४१९ विद्यार्थ्यांनी परीक्षा दिली. तर ५२८ विद्यार्थी गैरहजर राहिले. परीक्षा दुपारी २ ते सायंकाळी ५.१५ या वेळेत पार पडली. दिव्यांग विद्यार्थ्यांना अतिरिक्त वेळ देण्यात आला होता.
सर्वच परीक्षा केंद्रांवर प्रवेशापूर्वी उमेदवारांची बायोमेट्रिक पडताळणी करण्यात आली. दुपारी १.३० नंतर कोणालाही प्रवेश देण्यात आला नाही. प्रश्नपत्रिकांच्या सुरक्षेसाठी प्रत्येक केंद्रावर ड्युटी मॅजिस्ट्रेट नियुक्त करण्यात आले होते. भरारी पथके, समन्वयक व केंद्रप्रमुख यांच्याकडून सातत्याने देखरेख ठेवण्यात आली. पोलिस अधिकारी परीक्षा केंद्रावर ठाण मांडून बसले होते.
बायोलॉजी सोपा तर फिजिक्सचे प्रश्न अवघड असल्याची प्रतिक्रिया विद्यार्थ्यांनी दिली. परीक्षा केंद्रावर विद्यार्थांची कसून तपासणी करण्यात आली. विद्यार्थ्यांना परीक्षा केंद्रात जाताना आधार कार्ड व रिसीट इतकेच घेऊन जाण्याची अनुमती देण्यात आली होती. तपासणीसाठी प्रत्येक विद्यार्थीसाठी साधारण ५ ते ७ मिनिटे लागल्याचे विद्यार्थ्यांनी सांगितले. तपासणीवेळी रुमाल देखील काढून ठेवण्यास सांगितले. विद्यार्थिनींच्या दागिन्यांना मज्जाव होता.
