Mohol Kamati Crime News
कामती : मोहोळ तालुक्यातील कामती खुर्द येथील लमाण तांडा परिसरात सहा एकर शेतीच्या वादातून शेतकरी संजीवकुमार नागनाथ शिंदे (वय ५२) यांची तलवारीने वार करून निर्घृण हत्या करण्यात आल्याची घटना सोमवारी (दि. २२ ) सकाळी साडेसातच्या सुमारास घडली. या प्रकरणी पत्नी सुनिता संजीवकुमार शिंदे यांच्या फिर्यादीवरून सुरेखा सतीश शिंदे, रणजीत सतीश शिंदे व रितेश सतीश शिंदे यांच्याविरुद्ध कामती पोलीस ठाण्यात खुनाचा गुन्हा दाखल करण्यात आला आहे.
फिर्यादीनुसार, संजीवकुमार शिंदे हे सकाळी दूध व पाणी आणण्यासाठी गावात गेले असता शेजारील डाळिंब बागेत त्यांच्यावर हल्ला करण्यात आला. यावेळी सुरेखा सतीश शिंदे यांनी त्यांच्या डोळ्यात मिरची पावडर टाकली, तर रणजीत शिंदे व रितेश शिंदे यांनी तलवारीने हात, गळा व डोक्यावर वार केल्याचा आरोप आहे. हल्ल्यानंतर आरोपींनी सुनिता शिंदे यांनाही जीवे मारण्याची धमकी दिल्याचे फिर्यादीत नमूद करण्यात आले आहे.
पोलिसांनी घटनास्थळी पंचनामा करून मृतदेह शवविच्छेदनासाठी सिव्हिल हॉस्पिटल, सोलापूर येथे नेण्यात आला . फिर्यादीनुसार, संजीवकुमार शिंदे यांनी त्यांच्या नावे असलेली सहा एकर शेती इतरांना विकल्याच्या रागातून हा खून करण्यात आल्याचा आरोप करण्यात आला असून कामती पोलीस पुढील तपास करत आहेत.
