Solapur Mangalwedha highway accident
कामती : सोलापूर–मंगळवेढा राष्ट्रीय महामार्गावर रविवारी (दि. १९) दुपारी इंचगाव–बेगमपूरदरम्यान झालेल्या भीषण अपघातात शिक्षक जागीच ठार झाला. तर दुसरा गंभीर जखमी झाला. पिकअपने दुचाकीला मागून जोरदार धडक दिल्याने ही दुर्घटना घडली.
मृत तरुणाचे नाव महेश पांडुरंग पोपळे (वय ३२) असे असून, गंभीर जखमी झालेल्या तरुणाचे नाव अतुल दिनकर डोके (वय ३०, दोघे रा. अंकोली, ता. मोहोळ) असे आहे.
मिळालेल्या माहितीनुसार, सोलापूरहून मंगळवेढ्याकडे जाणारा पिकअप (क्र. एमएच ०९ एफएल ११२६) रिकामी कॅरेट घेऊन भरधाव वेगाने जात होता. त्याच वेळी अंकोली येथील अतुल डोके आणि महेश पोपळे हे दोघे मित्र (एमएच १२ केएस ६८८३) या दुचाकीवरून बेगमपूरच्या दिशेने जात होते.
इंचगाव येथील हौसाबाई शॉपिंग सेंटरजवळ आले असता भरधाव पिकअपने दुचाकीला मागून जोरदार धडक दिली. धडकेचा एवढा जोर होता की दोघेही रस्त्यावर फेकले गेले. यात महेश पोपळे यांच्या डोक्याला गंभीर दुखापत होऊन ते जागीच ठार झाले. तर अतुल डोके गंभीर जखमी झाल्याने त्यांना तातडीने सोलापूर येथील शासकीय रुग्णालयात दाखल करण्यात आले.
