सोलापूर : शहरातील दोन बडे सराफ व्यापारी, एक वकील तसेच बांधकाम व्यावसायिकावर बुधवारी (दि. 19) सकाळी केंद्रीय आयकर विभागाच्या पथकाने छापा टाकला. सलग दुसऱ्या दिवशीही संबंधितांच्या दुकाने, कार्यालयांमध्ये तपासणी सुरू होती. तब्बल 36 तासांहून अधिक काळ कसून चौकशी होत असल्याचे गुरुवारी दिवसभर दिसून आले. हा छापा नेमका कशासाठी पडला, संबंधित फर्मच्या आर्थिक व्यवहारात काही अनियमितता आढळली का, याविषयी मात्र रात्री उशिरापर्यंत माहिती उपलब्ध होऊ शकली नाही.
बुधवारी सकाळी सहा वाजता सुरू झालेली तपासणी गुरुवारी सायंकाळपर्यंत सुरू होती. सराफ बाजारातील दोन्ही सराफांच्या दुकानात काही आयकर अधिकारी आणि कर्मचारी जुन्या फायली, कागदपत्रे तपासण्याचे काम करीत होते. जुने विठ्ठल मंदिर परिसरातील दुकानात आणि घरात देखील आयकर अधिकारी ठिय्या मांडून होते. तेथे बाहेर पोलीस बंदोबस्त तैनात होता. त्यांच्याच नवी पेठेतील घरी आयकर कर्मचारी तैनात होते.
दुसऱ्या सराफ व्यापाऱ्याच्या टिळक चौक येथील घरासमोर मात्र सन्नाटा होता. मरिआई चौक येथील त्यांच्याच कन्स्ट्रक्शन साईटच्या कार्यालयातही दिवसभर आयकर अधिकारी चौकशी करीत असल्याचे चित्र होते. गांधी नगर परिसरातील बांधकाम व्यावसायिकाच्या कार्यालयात आणि मंगल कार्यालयातही चौकशीचा फेरा सुरु होता. याबरोबरच एका वकीलाच्या घर, कार्यालयावरही आयकर विभागाने छापा टाकला आहे. त्या वकीलांची चौकशी पूर्ण झाल्याची चर्चा आहे.
