सोलापूर : सोलापुरातील बेडर पूल येथे रविवारी सकाळी एका घरातील पाचजण गॅस गळतीमुळे बेशुद्ध अवस्थेत आढळून आले होते. त्यांच्यावर उपचार सुरू असताना दोन लहान मुलांचा रविवारी रात्री उशिरा मृत्यू झाला, तर त्यांच्या साठ वर्षीय आजीचा सोमवारी (दि. 1) दुपारी मृत्यू झाला. तिघांवर सोमवारी अंत्यसंस्कार करण्यात आले. सध्या या कुटुंबातील युवराज आणि रंजनाबाई या पती-पत्नीवर शासकीय रुग्णालयात उपचार सुरू आहेत.
बेडर पूल येथील रहिवासी युवराज मोहनसिंग बलरामवाले (वय 40), रंजनाबाई युवराज बलरामवाले (35), हर्ष बलरामवाले (6), अक्षरा बलरामवाले (4) आणि विमल मोहनसिंग बलरामवाले (60) हे शनिवारी घरात झोपले असता रविवारी सकाळी बेशुद्ध अवस्थेत आढळून आले होते. गॅस गळतीमुळे पाचही जण अत्यवस्थ झाले होते.
बलरामवाले यांचे घर अतिशय दाटीवाटीचे होते. आतून घराला कडी होती. सकाळी बराच वेळ झाला, तरी कोणी घराबाहेर येत नसल्याचे पाहून नातेवाईकांनी पत्रा उचकटून आत प्रवेश केला. बेशुद्ध कुटुंबीयांना तातडीने सोलापूरच्या शासकीय रुग्णालयात दाखल केले होते.
