पोखरापूर : चारित्र्यावर संशय घेऊन पतीने पत्नीच्या गळ्यावर कोयत्याने वार करून तिला ठार मारल्याची घटना दि. १ आक्टोंबर रोजी दुपारी साडे चार वाजण्याच्या पूर्वी मोहोळ तालुक्यातील नजीक पिंपरी गावच्या हद्दीत घडली.पतीला पोलिसांनी अटक केली आहे.
याबाबत मोहोळळ पोलिसाकडून मिळालेल्या माहितीनुसार, नजिक पिंपरी येथील बालाजी बापूराव वाघमोडे यांच्या शेतात गट नं ३७२ / १ मध्ये मकवान कापण्यासाठी परभणी जिल्ह्यातील टोळी आली होती. या टोळीतील दर्शन सुर्यभान वाणी रा. कातनेश्वर ता. पुर्णा, जि.परभणी व त्याची पत्नी सुनिता दर्शन वाणी हे पती पत्नी ही आले होते.
या टोळीतील मुकादम करण उर्फ शंकर गायकवाड याचे वडील संजय गायकवाड याचे सुनिताशी अनैतिक संबंध आहेत, असा संशय घेवून सुनिता वाणी वय २८ वर्ष हिच्या गळ्यावर तिचा पती दर्शन वाणी याने कोयत्याने सपासप वार केले. यात ती रक्ताच्या थारोळ्यात पडली. यातच तीचा जागीच मृत्यू झाला.सुनिता वाणी हिच्या खून प्रकरणी तिचा पती दर्शन वाणी यास पोलिसांनी अटक केली आहे. याबाबत ज्यांच्या शेतात ते आले होते, ते शेतमालक बालाजी बापूराव वाघमोडे यांनी याबाबत फिर्याद दिली आहे. अधिक तपास सहाय्यक पोलीस निरीक्षक किरण पाटील करीत आहेत.
