सोलापूर : जिल्हास्तरीय बँकर्स बैठकीत काही बँकांच्या कामकाजाबाबत असमाधान व्यक्त करून ठरवून दिलेले पीक कर्ज पूर्ण न करणे किंवा शासकीय योजना राबविण्यात झालेल्या दिरंगाईबाबत ॲक्सिस बँक, इंडियन ओव्हरसीज बँक, बंधन बँक आणि करूर वैश्य बँक यांना जिल्हा अग्रणी बँक व्यवस्थापकांनी नोटीस काढण्याचे निर्देश जिल्हाधिकारी एस. कार्तिकेयन यांनी दिले.
बँक सल्लागार समितीची बैठक जिल्हाधिकाऱ्यांच्या अध्यक्षतेखाली झाली. कर्जवितरणाची प्रगती, खाते उघडणीचे कामकाज आणि समितीने बँकांसमोर ठेवलेल्या उद्दिष्टांची अंमलबजावणी याविषयी यावेळी आढावा घेण्यात आला.
यावेळी जिल्हा अग्रणी बँक व्यवस्थापक राम वाखार्डे, जिल्हा अधिक्षक कृषी अधिकारी शुक्राचार्य भोसले, महाव्यवस्थापक जिल्हा उद्योग केंद्र उमेशचंद्र दंडगव्हाळ, ओबीसी वित्तविकास महामंडळाच्या जिल्हा व्यवस्थापक वृषाली लहारे यांच्यासह बँकांचे प्रतिनिधी उपस्थित होते.
