अक्कलकोट : कर्नाटकातून महाराष्ट्रामध्ये प्रवाशी वाहतूक करणाऱ्या कर्नाटकच्या बसेसची परमिटची तपासणी करून चुकीचे परमिट असलेल्या पाच बसेसवर अक्कलकोट आगाराच्या वतीने कारवाई करण्यात आली. त्यामूळे बसमधील प्रवाशांची तारांबळ उडाली.
कर्नाटकातील कलबुर्गी, जेऊर्गी, आळंद व अफजलपूर आगाराच्या बसेस मोठ्या प्रमाणात अक्कलकोट तालुक्यातून महाराष्ट्राच्या विविध भागांमध्ये प्रवासी वाहतूक करतात. काही बसेसचे परमिट एका मार्गाचे असते मात्र त्या दुसऱ्या मार्गाहून प्रवासी वाहतूक करत असतात. त्यांच्या चुकीमुळे प्रवाशांनाही एखादी घटना घडल्यास त्रास होऊ शकतो.
यामुळे अक्कलकोट आगाराच्या वतीने आगार व्यवस्थापक सत्यजित खताळ यांच्या उपस्थितीत अधिकारी व कर्मचारी यांनी बुधवार सकाळी दहा वाजल्यापासून येणाऱ्या सर्व कर्नाटकाच्या बसेसना अडवून त्यांची परमिटची पाहणी केली. योग्य परमिट आढळून आल्यावर त्या बसेस मार्गस्थ करण्यात आल्या. ज्या बसेसचे परमिट चुकीचे आहे अशा बसेस ताब्यात घेऊन आगारात लावण्यात आल्या . अचानक बसेस थांबल्याने बसमधील प्रवाशांची तारांबळ उडाली होती.
