पंढरपूर : श्री विठ्ठल - रुक्मिणी मातेचे अलंकार अतिउत्कृष्ट व असामान्य कलाकुसरीचे तसेच पुरातन व दुर्मीळ आहेत, असे अलंकार उत्सवाप्रसंगी श्री विठ्ठल - रुक्मिणीला परिधान करण्यात येतात. नवरात्रौत्सवाच्या पूर्वतयारीसाठी श्री विठ्ठल-रुक्मिणी मातेचे पुरातन अलंकार गाठविण्याचे काम सुरू करण्यात आले असल्याची माहिती मंदिर समितीचे कार्यकारी अधिकारी राजेंद्र शेळके यांनी दिली.
या पुरातन दागिन्यांत शिवकालीन, पेशवेकालीन अनेक अमूल्य दागिने आहेत. यामध्ये विठ्ठलास सोन्याचे पैंजण, बाजीराव कंठी, मत्स्य, तोडे, सोवळे (धोतर), हिर्यांचा कंबरपट्टा, बाजूबंद, दंडपेट्या, मणिबंध, सोन्याची राखी, तुळशीची सोन्याच्या मण्यांत गुंफलेली माळ, कौस्तुभमणी, हिरे, पाचूंनी गुंफलेली मोत्यांची कंठी, बोरमाळ, मोत्यांच्या माळा, पुतळ्यांच्या माळा, मोहरांच्या माळा, नवरत्नांचा हार, सोन्याचे मुकुट, हिर्यांचा मुकुट, सोन्याची शिंदेशाही पगडी, चांदीची काठी, सोन्याची मकरकुंडले, नील व हिरे बसवलेला नाम - म्हणजे सोन्याचा गंध असे अनेक प्रकारचे अनमोल अलंकार आहेत.
श्री रुक्मिणी मातेस सोन्याचे वाळे, पैंजण, साडी, कंबरपट्टे, माजपट्टा, रत्नजडित पेटया, हिरे, माणिक, पाटल्या, मोत्यांच्या व रत्नजडित जडावांच्या बांगड्या, गोठ, तोडे, हातसर आहेत. गळ्यातील अलंकारांमध्ये कारल्याचे मंगळसूत्र, दशावतारी मंगळसूत्र, कोल्हापुरी साज, पाचूची गरसोळी, लहान सरी, मोठी सरी, पुतळ्याची माळ, मोहरांची माळ, एकदाणी, बोरमाळ, ठुशी, तुळशीचा हार, झेला, पोहे हार, चंद्रहार, चपलाहार, पेटयांचा हार, शिंदेशाही हार, तन्मणी, चिंचपेटी, नवरत्नांचा हार, शिंदे हार, जवाच्या माळा आणि हायकोल सूर्य-चंद्र असे दागिने आहेत. हिर्यांचे खोड असलेला तन्मणी, तारामंडल असे अनेक प्रकारचे अनमोल अलंकार आहेत.
हे अलंकार जतन व सुरक्षततेच्या दृष्टीने प्रतिवर्षी नवरात्र उत्सवाच्या अगोदर गाठविण्यात येतात. नवरात्रोत्सव 22 तारखेपासून सुरू होत आहे. त्यामुळे हे काम त्यापूर्वी करण्यात येते. त्याप्रमाणे यावर्षी अलंकार गाठविण्याचे काम सुरू करण्यात आले आहे.
