Solapur Rain alert: सोलापूर जिल्ह्याला आज पावसाचा अंदाज

सोलापूर : सोलापूर शहर व जिल्ह्याला आज शनिवारी (दि. 9) वादळी वाऱ्यासह अवकाळी पावसाचा तडाखा बसेल, असा इशारा मोहोळ येथील कृषी विज्ञान केंद्राने दिला.

दरम्यान, मे महिन्याच्या तीव्र उन्हाळ्यात शुक्रवारी तापमानाचा पारा घसरला. 39.7 अंश सेल्सिअस कमाल तापमानाची नोंद झाली. तर दिवसभर ऊन, सावलीचा खेळ सुरू होता. सायंकाळी थंड वारे सुटल्याने नागरिकांना उकाड्यापासून दिलासा मिळाला.

एप्रिल महिन्यातील 9 तारखेला 38.2 पुढे 10 एप्रिल रोजी 40 तापमान होते. एप्रिल अखेरीस तापमान 44 अंशापर्यंत पोहोचले होते. त्यानंतर सलग 7 मेपर्यंत 28 दिवस कमाल तापमान 40 अंशावरच होते. गुरुवारी (दि. 7) पावसामुळे वातावरणात बदल होत तापमानात घट झाली.